Dr. Joachim guminambar pongingitanan miampai mogigiyon Kampung Lobou Baru katalib tumindapou Tadau Raya Riang Ria do hilo’.
RANAU: Kumoduo Boyoon Montiri II po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam miampai sawo, Datin Seri Linda Ewit tuminindapouo om pinopohimagon pamaramaian Tadau Raya Riang Ria nayatan Kampung Lobou Baru i pinaanjur id balai raya kampung dilo’ di konihab (ko 4tw Kaapat).
Dr. Joachim (tanga’) tinanud di Ponorikohon JKKK Samsuri Sharif (koduo, gibang) nogi’ ilo suai minamanau id pososorili’ Kampung Mesilouo ontok pinakayaán doid walai poingukab mogigiyon kampung do hilo’.
Dr. Joachim po nogi’ Montiri Koporintaan Koiyonon om Pomuwalaian (KKTP) amu’ oputut-putut karamit talap montok mamaramai Tadau Haji Raya Aidilfitri miampai mogigiyon id watas Lintuhun Undangan Pogun (DUN) Kundasang pointonod podi tadau kumoiso’ Syawal gisom no do tadau baino’.
“Monongkounsikou oku kumaa oinsanan i minagalap doho’ tumindapou om mamaramai Tadau Raya do hiti,” ka disio.
Dr. Joachim minonuau di mananwalai, Jaidi @ Okong Keritiman ontok tuminindapou walai poingukab Aidilfitri id Kampung Mesilou, Kundasang.
Dr. Joachim minoboros nogi’ do pamaramaian Tadau Raya do toun diti aramai kopio om rinamai do mogigiyon mantad mogisuai nayatan.
“Id pogun Sabah diti, mamaramai tokou do mogisusuai karararamaian. Tadau diti mamaramai tokou Tadau Raya Aidilfitri, ingkaa nogi’ i pamaramaian kararamaian suai miagal Krismas om Ramai Kaamatan,” ka disio.
“Ilo’ no kinolumison pogun Sabah,” ka disio kawagu.
Dr. Joachim pinapatahak toluod tuwa’ tomato kumaa mogigiyon Kampung Lobou Baru.
Nokotindapou minananud di Dr. Joachim id kinotombuluyan Aidilfitri diti nopo nga’ i Monunurat Olisok, Japli Sami; Lansanon Koburuon Mogigiyon, Dounis Sani miampai sitaf UPPM DUN Kundasang nogi’ tongo’ upisor ngaawi’ di Dr. Joachim.
Dr. Joachim (tanga) miampai di Linda (wanan) tinanud di Ponorikohon JKKK Kg. Naradau, Suidi @ Rosnim Dani kuminakap songulun tulun nolohing di sumakit.
Talib dilo’, kuminakap nogi’ i Dr. Joachim di songulun tulun nolohing i sumakit doid Kampung Naradau pogulu minonilombus pamaramaian Tadau Raya id Kampung Semuruh, Kampung Pinausuk om Kampung Mesilou.
