Hajiji sinuau dilo mogigiyon Islam id kinorikotan doid Ramai Mongukab Puasa Miampai Boyoon Montiri id natad Masjid Iman Haji Awang Hashim, Sipitang, di konihab.
SIPITANG: Boyoon Montiri, Datuk Seri Haji Hajiji Haji Noor minongomi Koporintaan GRS-PH sabaagi songinan koporintaan opoduli’ rayat.
Minoboros isio, ilo’ kopiongoi di ponginsomokan koporintaan buruanon dau dilo’ i toririmo opusou di kobolingkahangan rayat om monguhup diolo’ i ongosusa’ toi mosikin.
Ka disio, sundung pia koporintaan moningkanan kumaa inggisaman popoburu’ pogun om popotunda’ ikonomi, nga’ amu ilo’ insan do popoindisan inggisaman monguhup rayat i momoguno kopongobian.
“Miagal di noubasanan id wulan Ramadan, nununopo i powonsoiyonon tokou montok poposingkalab wulan diti, amu’ tokou kasaga’ momolihu diolo’ i amu’ songkuro kikosukupan.
“Ilo’ no o otopot kopio wookon barakan mogkodos mooi do kopuriman tokou do haro nayatan tambalut dati’ i momoguno toi kakal id kosusaon. Mantad no dilo’ id wulan Ramadan diti mogisusuai kaparagatan pohoroon tokou montok rumuba’ do rayat di komoyon ku diti.
“Id koporintaan, pasanganu tokou do iso’ katatapan toi kooturan hinombo do koporintaan diti, i komoyon ku do koporintaan rayat, koporintaan i opoduli’ kobolingkahangan rayat. Suai ko’ tingkananon tokou montok monuridong toi popoburu’ ikonomi dati’ miampai mogisusuai ralan, rayat mosikin toi i ongosusa’ diti kiguno do uhupan,” ka disio ontok minoboros id Ramai Mongukab Puasa Miampai Boyoon Montiri id Masjid Imam Haji Awang Hashim, do hiti, di konihab.
Hajiji sinuau dilo mogigiyon Islam id kinorikotan doid Ramai Mongukab Puasa Miampai Boyoon Montiri id natad Masjid Iman Haji Awang Hashim, Sipitang, di konihab.
Hajiji minoboros, kopiongoi di katatapan opoduli’ rayat i ginuno do GRS-PH, koporintaan minonuridong kooturan poposodia’ ponguhupan kumaa rayat di momoguno, mimpuun mantad tanak di kosususu gisom no do tulun nosukod.
Ka disio, montok tanak di kosususu, koporintaan pinoposodia’ tabung balajaran sabaagi kokoriu soira’ diolo’ kosuang id timpu kosikulan.
“Minonuridong tokou tabung balajaran kumaa tangaanak di kosususu. Pikikiro ogumu’ i amu’ nokoilo do haal diti, nga’ mimang do haro ponguhupan montok diolo’. Ilo’ no i roitan tokou do koporintaan diti sabaagi koporintaan opoduli’ rayat, tu’ mantad di wagu kosusu gisom rayat di nolohing om amu’ osukupan uhupan tokou,” ka disio.
Pinointalang disio, ogumu’ no i nowonsoi do koporintaan i koowit kumaa opoduli’ rayat, kaampai ponguhupan kousinan RM300 sombulan solinaid sontoun kumaa rayat mosikin nakadala’ do toun diti.
Kaawagu ka disio, Kabinet Pogun di tadau Kotolu pinopolulus Ponguhupan Pinotomod Kousinan kumaa kukumaraja’ koporintaan pogun soginumu’ RM500 montok pamaramaian Aidilfitri tulan diti om RM500 po kopihondot Kaamatan do wulan Kolimo obontol.
Naamot dilo’, Hajiji minoboros, kinosumpakon Sipitang i miorosdo Sarawak, suai ko’ osomok do Brunei om Kalimantan, Indonesia kapanahak kosuulon kumaa watas diti.
Hajiji pinapatahak toluod kumaa tinimungan asnaf id Ramai Mongukab Puasa Miampai Boyoon Montiri id natad Masjid Iman Haji Awang Hashim, Sipitang, di konihab.
Kinoiyonon di kosudong dilo’ ka disio, wookon i kounsub mangangapu’ rumikot id watas diti do papaapu’ id pomorunan tumau om gas, kosuul no id Taman Pomorunan Tumau om Gas Sipitang (SOGIP).
Asil dilo’ ka disio, taman pomorunan dilo’ noponu’ no om noondo bohogian kikuasa’ SOGIP mongupalai koiyonon wagu montok popoinggayo pomorunan tumau om gas id watas diti.
“Id Sipitang, SOGIP noponu’ no om minongupalai ilo’ montok momoruhang po do koiyonon tana’. Nung aiso’ tana’ do hiti, ukaban tokou iso’ taman wagu doros Beaufort, iti nopogibabarasan no id Kabinet tu’ aiso’ nodii koiyonon montok mangangapu’.
“SOGIP noponu’ mamaso koporintaan GRS-PH, kirati do Sipitang kiharo timpu dumontol di anawau tu’ koiyonon diti do obontol koburu’ miampai ogumu’ kaparagatan ikonomi. Mantad do hilo’, koluyungon kousinanan mantad kaparagatan ikonomi koluyung kumaa rayat, mongingindapu’ restoran, gerai om susuai po, ogumu’ i kaanu koundaran mantad dilo’ do somonu’,” ka disio.
Kopihondot ramai dilo’, Hajiji pinapatahak nogi’ toluod om ponguhupan kumaa tinimungan asnaf, tanak yatim om i nogompitan kadaaton liyud.
