Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minanagur do Parti Warisan tu’ minamagayat kotinanan Istana Pogun id suang pomoinan pulitik om tudut diolo’.
Minoboros isio, kinapaatadan id media sosial di lansanon Warisan, Datuk Darell Leiking om Datuk Azis Jamman i minombohit pamaramaian pinotomod Kouliton Toun Kinosusuon Pinotomod di Molohingon Agayo Pogun (TYT) Tun Musa Aman atalang do kiginawo araat.
“Sabaagi Boyoon Montiri, kitonggungan oku do mongumolig om momusus kotinanan Istana amu’ momuntuk om isai i nosili Molohingon Agayo Pogun.
“Atalang kopio, pulitik nokopomohour ponimbangan diolo’ (Darell om Azis), gisom amu’ kaanu monompini’ id pialatan koporintaan, pulitik om Istana.
“Kotinanan Istana nopo nga’ kikoyuon apolitikal om amu’ apatut silihon kakamot id pulitik dalan noponu’ pongudutan om pangakalan do Warisan,” ka disio id kointalangan di tadau baino’.
Hajiji pinopointalang do di kolimpuunon, Tun Musa pinapaatag mooi do aiso’ pamaramaian pohoroon toun diti tu’ tadau pinotomod Kapamaramaian Kinouliton Toun Kinosusuon Pinotomod TYT pinohimagon do ko 30tw Kotolu, i kopiampap do pamaramaian Tadau Raya.
“Om i Musa nogi’, nga’ amu’ asaga’ do monginggorit bohogian di kohompit id pongonjuran pamaramaian tu’ timpu di osingogo’ om kos di amu’ nuru’.
“Nga, sabaagi Boyoon Montiri, opurimanan ku do nunu-nunu kootusan kiguno pogibabarasanid Mitingan Kabinet Pogun,” ka disio.
Pinopoilo isio, katalib o pinogibabarasan poinralom, Kabinet nakaakun do pamaramaian dilo’ mositi’ do pohoroon toun diti kopiongoi di konvensi om kinoubasanan Istana.
“Mantad dilo’, pinatatap do pamaramaian maan pohoroo’ do wulan Koónom, nga’ miampai osuhatanan miagal di pinokianu om pinosunud di Tun Musa,” ka disio.
Kohondot dilo’, ginumu’ ababayan ningkurian mantad 12 di toun 2024 kuminaa do turu’ no do tooun diti, potilombus dino nokoponginsiriba’ pabalanjaan kikiro 30 pihatus.
Hajiji minoboros, io’ Darell dii Azis nokoumbal id suang koporintaan pogulu diti om apatut do koilo nunu i kohompit id posodiaan Tadau Kinosusuon TYT.
