Hajiji miampai di Dr. Joachim, Masidi, Abidin om tongo’ lansanon om puru parti komponen Gabungan Rakyat sabah (GRS) nogi’ mogigiyon i nokotindapou id Ababayan Jelajah Sayangi Sabah Zon 4 Ranau.
RANAU: Boyoon Montiri, Datuk Seri Haji Hajiji Haji Noor pinoposotol do kointalangan disio pogulu diti karait do mandat mantad rayat nopo nga’ mantad no do kotumbayaan do koporintaan buruanon dau koguli’ momorinta’ katalib Pomilian Agayo Pogun Ko-17 (PRN17).
Minoboros isio, laang do ponokisahap i papakadaada’ kointalangan dilo’ kaagal nopo boros-boros toomod.
“Haro nogi’ lansanon i mongomi nung mokianu tokou kawagu mandat kumaa rayat, mogisuai-suai po boroson diolo’, sinongkoboros-boros. Yoho’ nga’ amu’ karati, osonong poboroson tokou posuayon diolo’.
“Nung moboros tokou do naangayan koporintaan babaino’ diti osonong kopio om nuru’ onuan mandat insan po id pomilian agayo obontol, moboros tokou dilo’ tu’ otumbayaan tokou do kaanu tokou momorinta’ Sabah insan po katalib o PRN.
“Yati’ okon ko’ olomog, haro i mongomi dati’ do ‘gagal’ nga’ koporintaan diti amu’ gagal, tu’ i nopo gagal dilo’ nga’ yolo’ no iri i rinoitan do ‘pencacai’ ngaawi’ dilo’,” ka disio.
Hajiji miampai di Dr. Joachim, Masidi, Abidin om lansanon GRS guminambar miampai mongongobi’ mamaramit geran tana’ mamasok pogun id Ababayan Jelajah Sayangi Sabah Zon 4 Ranau.
Minoboros isio dilo’ id ababayan Jelajah Sayangi Sabah Zon 4 Ranau onjuran Gabungan Rakyat Sabah (GRS) id Pentas Budaya Kakadayan Kundasang, do hiti di tadau baino’.
Nokotindapou nogi’ Kumoduo Boyoon Montiri II po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam; Montiri Kousinan po nogi’ ADUN Karanaan, Datuk Seri Masidi Manjun om Monguhup Montiri kumaa Boyoon Montiri po nogi’ ADUN Paginatan, Datuk Abidin Madingkir.
Hajiji po nogi’ Ponorikohon GRS minoboros, rayat amu’ kasaga’ kasala’ momili’ id pomilian agayo obontol montok papatantu’ nunu i nokoumbal naantakan id susuyan pulitik pogun diti amu’ ohulit.
“Nuru’ tokou minsingilo susuyan pulitik tokou di nakatalib, mositi’ tokou misompuru, kada’ haro id Ranau diti i mogi’taja-taja, amu’ oku mokimorongou dilo’, nung isio mantad GRS manaja tulun, amu’ tokou kaanu mamaramit dilo’. Orohian oku poposotol sabaagi Ponorikohon GRS iti amu’ kaanu do aantakan.
“Mositi’ tokou komilo mimpulitik, ula’ no do pogiodu-oduhon tokou, minaan uriaso’ pogulu diti, kada’ tokou ilihai kosiwatan diti baino’.
“Ogumu’ parti noondo kokito pisompuruan GRS, pokitanan tokou kumaa diolo’ do GRS nopo nga’ pilion rayat tokou id Sabah. Iti kosiwatan di osonong kopio i pouyuhon tokou kumaa rayat Sabah,” ka disio.
Ka disio, PRN17 nopo kosiwatan bobos osonong montok popokito do GRS sabaagi piomungan parti nokoiyonon nopo nga’ pilion di kotondu’ montok rayat Sabah.
“Pokitanan tokou GRS okon ko’ ‘sembarangan’, nokopomorinta’ tokou no do apat toun, ogumu’ kinalantaion i nosigampot soira’ tokou minomorinta’ Sabah.
“Nga’, haro id labus sinongkoboros-boros karait GRS, ilo’ nopo nga’ sabab no do amu’ yolo’ kokito, amu’ mintong nunu kinalantiaon GRS.
“Haro po lansanon i rumikot do monginsonong kaka do Sabah, yoho’ nga’ amu’ koilo mantad nombo, nga’ i oilaan diolo’, rumikot mantad labus kumaa do hiti, ‘temberang’ nopo,” ka disio.
Karait nindikohon GRS id Ranau, pinopolombus i Hajiji kotumbayaan disio do tolu timpohon DUN id koiyonon dilo’ aanu momusus id siriba’ GRS ontok pomilian agayo obontol.
“Id Ranau diti haro tolu DUN, pokionuon ku rayat tokou id Ranau, otutunan ku kopio o koubasanan mogigiyon id Ranau diti, tulun dau ongosonong kopio om outmbayaan oku id PRN do obontol Kundasang, Karanaan om Paginatan kakal pasanganu GRS,” ka disio.
Id ababayan dilo’, pinapahabar nogi’ i Hajiji kapamansaian kawagu jambatan gantung id Kampung Lingkudau, do hiti, i naraag gama-gama’ liyud osolog di kaawagu diti miampai kinopoobian RM350,000.
Suai dilo’, pinapahabar nogi’ isio kopoobian RM1 riong montok kapamaraladan Pentas Poingukab Kakadayan Kundasang om RM6 riong montok ponuridong Lintuhun Mogisuaiguno Kundasang.
Kopihondot ababayan dilo’, pinapatahak nogi’ i Hajiji 1,143 geran tana’ mamasok pogun (Anak Negeri) kuminaa mogigiyon kampung mantad DUN Kundasang, Paginatan om Karanaan kopohompit ginayo 4,177.354 ekar.
