KIULU: Parti Bersatu Sabah (PBS) om Parti Solidariti Tanah Airku (STARSABAH) mositi’ ogirot misompuru montok monimporon timpohon poinharo mantad nogi’ kaanu lobi kogumu’ timpohon id pomilian agayo pogun do obontol, ka di Luguan Kopointalangan PBS, Datuk Joniston Bangkuai.
Pinosotol disio do pisompuruan id PBS-STARSABAH nopo nga’ haal oponsol id kopotontuan kapangampawongan pulitik di po’ompus id piomungan Gabungan Rakyat Sabah (GRS).
“Nung aiso’ pisokodungan, angkab tokou kotimporon sabaagi nipian.
“Piuhupan id pialatan PBS om STARSABAH nopo kosiwatan montok dati’ misokodung om monginggirot GRS id pomilian agayo pogun obontol.
“Piilangan diti amu’ apatut pasalaon pomurotian,” ka di Joniston, i po nogi’ Luguan Kopointalangan GRS, ontok minoboros i Pitimungan Solidariti PBS-STARSABAH N.15 Kiulu do hiti di konihab.
Ababayan dilo’ pinohimagon di Presiden STARSABAH om Kumoduo Ponorikohon GRS, Datuk Seri Dr. Jeffrey Kitingan. Wookon nokotindapou i Monunurat Agayo STARSABAH, Datuk Edward Linggu om Luguan Bohogian STARSABAH Kiulu, Terence Sinti.
Joniston pinoposotol do monimporon timpohon di nalantoi PBS om STARSABAH nopo nga’ tingkananon, tu’ koiyonon ngaawi’ diti kopokito kotumbayaan om mandat i pinatahak do rayat.
“Miampai piuhupan di po’ompus, turu’ timpohon i nalantoi do PBS om onom timpohon do STARSABAH mositi’ kotilombus poinsanganu dati’,” ka di Puru Lintuhun Undangan Pogun (ADUN) Kiulu dilo’.
Pinosotol disio do PBS om STARSABAH okon nopo ko’ kiangkab momusus timpohond iolo’ nga’ nogi’ paparalad kuasa diolo’.
“Ii nopo kosiantangan dati’ nga’ koinggumuon timpohon i patahakon kumaa PBS om STARSABAH, om hiti no pisompuruan dilo’ kapapamanau tonggungan oponsol,” ka di Joniston, i minangakun do kopomuruanan parti papaharo pibarasan id GRS montok mamalan karalano’ kopogiikidan timpohon.
Ka disio kawagu, piuhupan poinharo mantad id 13 timpohon i nalantoi PBS om STARSABAH nopo nga’ impohon ogirot i kiguno inggirotan.
“Soira’ koingkawas ginumu’ timpohon, kosili tokou lobi kagaras, om iti no kosiwatan dati’ do manahak sokodung di lobi kouli’ kumaa kopomuruanan,” ka disio.
Pinointalang nogi’ disio do araramit kumaa piuhupan PBS- STARSABAH kounsub kopio m rinamit osonong do rayat, i kapanahak tanda’ osonong kumaa sondikoton papatantu’ kalantaion pointantu’ no kumaa GRS.
Di ko 18tw Kaapat 2024, PBS om STARSABAH suminain Memorandum Pihunungan (MoU) domonginggirot piuhupan montok pomilian agayo pogun, miampai di Dr. Jeffrey om Ponowoli Presiden PBS, Datuk Seri Dr. Joachim Gunsalam, pinoposotol do tonggungan diolo’ montok popironit pisuayan pulitik.
