Khaw Kok Chin (tanga’) ontok kapahabaran id Briged Sabah PGA, Kinarut, Papar di tadau baino’.
PAPAR: Kinoiyonon Sabah i notutukan pulou om osomok do pogun sombol nokoposili pogun diti koiyonon ‘transit’ (koumbaya’on) sindikit kopoikidan dadah.
Ka do Utusan Malaysia, Potunud Koupisan Ponoriukan Kopomusalaan Narkotik (JSJN) Bukit Aman, Datuk Seri Khaw Kok Chin minoboros, kopokionuan di akawas miampai gatang songkilogram dadah ponit syabu kosigampot RM450,000 id pogun sombol nokounsub sindikit mumbal mogowit dadah maya’ Sabah kumaa pogun sombol.
Minoboros isio, otopot nopo pogun ngaawi’ id Malaysia diti montok no do koiyonon poumbayaan, okon ko’ papalabus om ingkaa nogi’ Sabah i sasaru’ silihon longkod poumbayaan sindikit kopoikidan dadah.
“Nung okito tokou id Malaysia, songkilogram syabu pikikiro Rm33,000 gisom RM35,000, nga’soira’ koongoi id pogun sombol, kaanu ilo’ do minsawat gisom RM450,000 mantad no do kopokionuan di akawas.
“Miampai gatang di ingkaa kagayo, kogumuan sindikit mumbal maya’ do hiti om mogowit dilo’ kumaa pogun soborong maya’ ralan rahat. Nga’, haro nogi’ montok kogunaan pidagangan nokoiyonon,” ka disio katalib minonorikohon mitingan JSJN miampai Briged Sabah Tinimungan Gerakan Am (PGA) om Tinimungan Pulis Marin Watas Apat Sabah id PGA Kinarut, di baino’.
Khaw Kok minoboros, mantad no do kinoiyonon di kosudong id suang piwolitan ‘segitiga’ pialatan Malaysia, Filipina om Indonesia nokoowit sindikit lobi orohian montok popoindalan id Sabah do mogowit dadah kumaa soborong.
Id sunduk do Malaysia, dadah owiton sumuang kumaa Sabah momoguno surupukaraja’ kurier maya’ rahat toi tawan mantad Semenanjung Malaysiaom talib dilo’ mantad Sabah pootodon kumaa pogun sombol.
Kohondot dilo’, ka disio, laang ngaawi’ mamaso palanon montok monoibau sindikit ponoludupan om kopoikidan dadah id Sabah.
Ka disio, koiyonon alasu’id kinoiyonon pulou ngaawi’ i nosili wawayaan tongo’ sindikit nga’ noilaan om mamaso powonsoiyon palan miampai kotinanan ngaawi’ di suai kaampai ponguhupan mantad Tinimungan Gerakan Tawan (PGU) id pomorunaan drone.
Poingkuro po, palan miampai osorisid amu’ aanu mamarait tu’ korosian kapasaga’ di sindikit mongilag mantad laang i onuon do boogian kikuasa’.
Gisom noondo, koiyonon ‘hotspot’ i noilaan kogumuan id pulou ngaawi’ pososorili’ Tawau, Sandakan om Semporna.
