Dr. Joachim (poungkakat kolimo, wanan) guminambar pongingitanan miampai oinsanan mongingigit adat id toguang Balai Adat Mukim Timbua.
RANAU: Kumoduo Boyoon Montiri II i po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam pinopohimagon linimput Balai Adat Mukim Timbua do hiti, konihab.
Minoboros isio, Balai Adat dilo’ kapasanang koponguludan kes ngaawi’ adat id Mukim Timbua, potilombus dino kopongingkuri’ tonggungan mogigiyon i pogulu diti nuru’ kumaa Kakadayan Ranau do manalasai kobolingkahangan diolo’.
“Balai Adat diti nga’ kikogunaan nogi’ sabaagi koiyonon mogiboboros mogisusuai haal, kopogkikit kos padsakaian kumaa Kuut Mamasok Tanak Pogun (MAN) id Kakadayan Ranau, om sabaagi longkod poopian buuk adat kinoubasanan nogi’ pinonorisidan ukum adat montok sakag babaino’ om obontol,” ka di Montiri Koporintaan Koiyonon om Pomuwalaian dilo’.
Dr. Joachim (tanga’) pinopoindalan kopomutulan ribon montok pinopoimagon Balai Adat Mukim Timbua om poingintong io’ Dominic (gibang) om i Muhasip (koduo, wanan).
Dr. Joachim minanangkabayahan kuminaa Ponorikohon Manganganjur, Molohingon Kampung Saukin Sama om tongo’ mongingigit adat i nakapaanjur ababayan diti miagal tonggungan akawas.
Pinopolombus nogi’ isio pongunsikohan kumaa tongo’ mongingigit adat i tumilombus momoguno adat kinoubasanan id nayatan mogigiyon Mukim Timbua, i kapaampai do 14 kampung.
DUN Kundasang i kiharo 100 kampung tumilombus onuan kopomodulianan do koporintaan montok monumboyo’ kogugunaan diolo’.
Dr. Joachim minonuhu’ MAN do papantantu’ kampung ngaawi’i momoguno Balai Adat miagal diti onuan kopomodulianan.
Nunsub po nogi’ di Dr. Joachim tongo’ Luguan Adat do tumilombus monokodung koporintaan Gabungan Rakyat Sabah (GRS) id siriba’ kopomuruanan di Boyoon Montiri, Datuk Seri Haji Hajiji Haji Noor.
Dr. Joachim suminain ‘plak’ Balai Adat Mukim Timbua om sinasi’ dilo koinsanai mongingigit adat i nokotindapou doid ababayan dilo’.
Pinoindalan nogi’ kinopoimaganan kapangansaran Linimput Lintuhun Mukim Timbua om kinapatahakan bakul takanon kuminaa mogigiyon.
Monunurat Pulitik kumaa di Dr. Joachim, Yubidi Gumpoyo; ii Luguan Watas, OKK Muhasip Haji Ruman om OKK Dominic Ghanie; Upisor Lansanon Mogigiyon DUN Kundasang, Dounis Sani; nogi’tongo’ Mobi’ Luguan Mamasok Pogun (WKAN), tongo’ molohingon kampung, om lansanon mantad DUN Karanaan nga’ nokotindapou nogi’ id ababayan dilo’.
Pinopolombus yolo’ do tonggungan montok misokodung id mogisuai haal, popoindisan pisuayan pulitik om ugama’ montok no do kasasanangan mogigiyon.
