Dr. Joachim ruminuba’ dilo songulun mongingindapu’.
KOTA KINABALU: Parti Bersatu Sabah (PBS) pinoposotol ningkakaton montok tumilombus miampai Gabungan Rakyat Sabah (GRS).
Ponowoli Presiden PBS, Datuk Seri Dr. Joachim Gunsalam minoboros, nung Parti Warisan orohian miuhup do PBS om Solidariti Tanah Airku (STARSABAH), nga’ lobi kosonong nung tumilombus yolo’ misokodung id GRS, okon ko’ miampai duo no parti, tu’ laang dilo’ okito kaagal-agal kituduan montok mongurias parti id GRS.
“PBS poinsuang no id GRS om otiu’ kumaa GRS pointonod tadau kumoinsan dilo’ do tinuridong. Yahai (PBS) tumilombus miampai GRS do solilinaid,” ka di Kumoduo Boyoon Montiri II dilo’ montok sisimbar kumaa kointalangan Warisan di kaawagu diti i pinopolombus kororohian montok misokodung miampai PBS om STARSABAH.
Minoboros isio dilo’ soira’ rinubaan ontok pinapaharo ‘walkabout’ kopihodot Toun Wagu Sina id Tomu Mingguan Gaya Street do hiti, konihab (ko 13tw Koiso’).
Dr. Joachim po nogi’ Montiri Koporintaan Koiyonon om Pomuwalaian nga’ pinoposotol nogi’ do pembangkang popopulitik nopo di haal ‘integriti’ i pinasawit miampai GRS.
“Id pulitik, oinsanan tokou tumalahan do toluod, om ilo’ nopo nga’ haal id aramit, om oinsanan pomogunon tumalahan kumaa toluod id pulitik. Ralan koponguhupan dilo’ do papatahak pikikiro doti’ do sopisuai, nga’ montok doho’, amu’ tokou kaanu popisawit pomoromitan toluod mantad ‘konglomerat’, minsosongulun toi komponi suai miampai do haal integriti,” ka disio pinopointalang.
Id kinotombuluyan osuau dilo’, Dr. Joachim ruminuba’ om pinopoikid kalendar toun 2025 kumaa tongo’ mongingindapu’ Tionghua om tulun ginumuan i minooi doid tomu tikid minggu dilo’.
Nakaampai nogi’ i tongo’ Kumoduo Presiden PBS, Datuk Seri Dr. Yee Moh Chai om i Datuk Jahid Jahim; Timbang ngaawi’ Presiden, Datuk Henrus Anding om Datuk Johnny Mositun; Monunurat Agayo PBS, Datuk Julita Majungki; Kumoduo Monunurat Agayo, Datuk Jonnybone Kurum; Monobubut PBS, Datuk Lu Kim Yen; tongo’ Puru Kounsol Akawas; Luguan Tinimungan Komulakan, Christoper Mandut; Kumoduo Luguan koonduan, Datin Seri Vicky Yee; Luguan Kopointalangan PBS, Datuk Joniston Bangkuai; Luguan Kopointalangan PBS Bohogian N.20 Api-Api, Yee Tsai Yew; nogi’ tongo’ Exco Komulakan om Koonduan, kaampai no tongo’ Luguan Bohogian.
Dr. Joachim minonongkounsikou nogi’ kumaa GRS Api-Api i nakaampai id kinotombuluyan dilo’.
Nokopogulu, isio miampai tinonudan ruminuba’ nogi’ tongo’ mongingindapu’ id pososorili’ Pasar Lido.
“Tikid pamaramaian Toun Wagu Sina poinsuul kopio. Mantad dilo’, tumimung tokou miampai tongo’ luguan bohogian om puru parti do mooi ruba’ tongo’ mongindapu’ id pososorili’ Kota Kinabalu, kaampai no mogigiyon i mamaramai.
“Kalansanan Toun Wagu Sina diti koowit kounsikohan, kotoodan, komogoton om kasasanangan kumaa Sabah. Mamason yahai Kounsikohan Toun Wagu Sina kumaa oinsanan mogigiyon Sabah. Kalansanan Sabah kotilombus otoronong om koburu’,” ka disio.
