Christina Liew
KOTA KINABALU: Pulou Sibuan i sinompon naamot pointonod ko 7tw Koiso’ nosusuhut kinokitanan ‘objek’ i noilaan sabaagi bom laid (unexploded ordance – UXO), pinatatap do ukaban kawagu kumaa tutumombului do ko 15tw Koiso’ soira’ oinsanan laang koumoligan nopongo pinopoindalan.
Montiri Ponombuluyan, Koubasanan om Sandad Posorili’, Datuk Seri Christina Liew pinopoilo diti id iso’ kointalangan di tadau baino’.
Liew pinopointalang, ponuhuan ponomponan naamot pulou dilo’ nokotimpuun soira’ duo Mananamong Tisan Rahat Taman-Taman Sabah (TTS) i poingkaraja’ id Pulou Sibuan nokokito objek i kaagal songinan bom laid ontok pinopowonsoi kinopogintongan om pomurisian koiyonon ‘snorkeling’ id tisan rahat pulou dilo’.
“Mongungulud Taman, Taman Marin Tun Sakaran pinoilo do kinokitonan dilo’ om ruputan pulis winonsoi ontok tadau di miagal. Upisor Kopoiyanan Pos Pulou Sibuan 10 RAMD, Tinimungan Susumangod Malaysia (ATM) nga’ pinoilo do haal dilo’.
“Tuduan do TTS minonompon naamot Pulou Sibuan mantad nunu-nunu kaparagatan ponombuluyan do misinggogo’ nopo montok papatantu’ koumoligan tongo’ tutumombului om sitaf i poingkaraja’ id pulou dilo’ poinjamin.
“Poingkuro po kaparagatan ponombuluyan id pulou ngaawi’ di suai id TMTS miagal do Pulou Bohey Dulang om Pulou Mantabuan poindalan miagal toririmo,” ka disio.
Bom laid dilo’ naanu minomunso di tumotolop ‘ranjau’ Susumangod Rahat Diraja Malaysia (TLDM) di ko 11tw Koiso’ katatalib, di jaam ko 3.10 sodopon.
“Pulou Sibuan ukaban kawagu kumaa tutumombului do ko 15tw Koiso’ 2025 soira’ nopo do pulis om tinimungan koumoligan nogi’ TTS kopongo momonsoi karaja’ kopomurisian om koponimungan di binabak bom,” ka di Liew.
