Haji Hajiji Haji Noor
KOTA KINABALU: Kopomoromitan Tadau Sabah lobi kirati tu’ rinamai ilo’ miampap do Tadau Kabansaan mimpuun toun diti, ka di Boyoon Montiri Datuk Seri Haji Hajiji Haji Noor.
Minoboros isio, tadau 31 wulan Kowalu’ (Magos) tikid toun nopo oponsol om poinggamut id susuyan kahandaman, okon ko’ montok nopo momuhondom om mamaramai nga’ montok rotion id sunduan kopongupusan pogun (patriotisme) nogi’ mamagatang kinobulunon om kinolubukan agayo pinopoburu’ kinopomorintaan sondiri’ (kinagabasan) pomogunon.
Kohondot dilo’, pinokianud isio mogigiyon Malaysia id Sabah do ‘istiqamah’ id kapanamangan kobontugan pomogunon om tumilombus mamaramit Tadau Kabansaan om Tadau Sabah miampai poinponu’ sunduan om osiriba’ ginawo tu’ kinagabasan nopo nga’ gaa’ di amu’ agatang.
“Haal di nokoposompuru’ dati’ – kotoronongon, piuludan, pisompuruan id kopogisusuaian om angkab tokou montok komogoton om koburuon posoibau mantad haal ngaawi’ i kopongurias dati’.
“Kanou tokou no potonomo’ id ginawo tokou do kapamaramaian Tadau Kabansaan om Tadau Sabah nopo nga’ yati’ sanganu. Kanou tokou mungkakat ogirot monokodung koporintaan om amu’ aampawong di haal poinsala’ i mongundoronok om mongurias dati’,” ka disio id Pason Tadau Kabansaan om Tadau Sabah 2024.
Hajiji minoboros, uhu kapamaramaian Tadau Kabansaan 2024 “Malaysia Madani: Jiwa Merdeka” kopokito tonggungan koporintaan montok tumilombus popoburu’ mogigiyon di aadas om komogot nogi’ kopokito kinagabasan mogigiyon Malaysia mantad koyuon ngaawi’ di araat id kopomorotian patriotisme om mongupus pomogunon.
Boyoon Montiri minamason Kotobian Mamaramai Tadau Kabansaan om Tadau Sabah 2024 kumaa oinsanan mogigiyon Malaysia.
