Dr. Joachim (tanga’) ruminamit watikah kinoposilihan mantad di Julita.
PENAMPANG: Datuk Seri Dr. Maximus Ongkili miampai pohimagon pinapatahak karaja’ Presiden kuminaa di Kumoduo disio Datuk Seri Dr. Joachim Gunsalam id Mitingan Kounsol Takawas Parti Bersatu Sabah (PBS) id longkod upis dilo’ do hiti di tadau baino’.
Dr. Maximus, i minomuruan do PBS pointonod onom toun di nakatalib, pinoposili di Dr. Joachim sabaagi ponowoli Presiden poinggirotkuasa’ misindikot.
Id pason i binasa’ di Monunurat Agayo parti Datuk Julita Majungki, Dr. Maximus minongomi tadau dilo’ no’onu’ do kopurimanan di mogirorolot nga’ pinopoilo do kopoundolihan karaja’ nopo nga’ kiguno montok koundaran parti.
Dr. Joachim (tanga’) guminambar miampai Puru Kounsol Akawas parti.
“Tadau baino’ norikot nodi timpu kosimbanon i otumbayaan oku koowit koinwoguon ilo’ nopo nga’ kapatahakan toi kopoundolihan karaja’ om tonggungan sabaagi Presiden kumaa di ponowoli sinili i pinili’ ku sondiri, tumanud kooturan Perkara 15 (iii)(a) Koundangan PBS, ilo’ nopo nga’ Kumoduo Presiden tokou, Datuk Seri Dr. Joachim Gunsalam.
“Kiguno tokou kopuriman do okon ko’ asanang montok sosongulun lalansanon montok mongiliu karaja’, tonggungan om tinonggungan dau kumaa monowoli id nayatan nuludan momuruan. Amu’ olimon do ogumu’ poguhotan di koimbulai, om ogumu’ kaantaban i otoguang disai nopo i mongigit toi i sabaagi Presiden nombo-nombo parti toi kotinanan lolobi no parti i kisinusuyan kahandaman kopio om kirati kumaa mogigiyon Sabah di koupusan,” ka disio.
Dr. Maximus poingkuro po minoboros, miampai koyuon kolidasan disio noondo i momoguno lobi kogumu’ kopomodulianan om moningkanan kumaa kolingosan disio, otumbayaan isio kinoposilihan di Dr. Joachim nopo nga’ kootusan di osonong montok PBS do noondo diti.
“Kalansanan ku mantad kinoposilihan diti, kopomuruanan parti tokou tumilombus misompuru montok monilombus kopoburuan i amu’ po nopongo montok mogigiyon om pogun Sabah,” ka disio.
