PENAMPANG: Angkab koporintaan Pisompuruan montok momupus komosikinan nakadala’ (tegar) id Sabah opongo pogulu koompokon tulan Koturu’.
Tumanud Utusan Malaysia, Luguan Montiri, Datuk Seri Anwar Ibrahim minoboros, koposuulan patahakon montok monoibau komosikinan tegar om Sabah kiharo kobolingkahangan di lobi kagayo nung piadangon do Pulau Pinang om Selangor.
“Osorou ku nanamot komosikinan dilo’ maganu timpu montok asalasai, komosikinan tegar diti kirati, unifom sikul amu’ koboli, takanon tinumon, susu montok baragang pikikiro haro kobolingkahangan.
“Ilo no tonggungan koporintaan Pisompuruan miampai pogun montok momupus komosikinan. Di timpuunon haro kikiro 20,000 mosikin tegar om talib dilo’, minaganu tokou do laang osikap om noondo noolu’ po 9,000 tulun.
“Di konihab ontok mitingan KPSU, monongkounsikou oku tu’ nakaanu sokodung poinponu’ mantad koporintaan pogun. Manu tokou momupus komosikinan tegar id pogun Sabah pogulu koompokon wulan Koturu’ 2024,” ka disio id pinomupusan Ramai Kaamatan doid Lintuhun Hongkod Koisaan KDCA, di tadau baino’.
Ka disio, kinopoobian kumaa Sabah nga’ pinoingkawas mantad RM12.9 bilion toun diti om ginumu’ dilo’ osodu’ lobi kakawas nung piadangon di40 pihatus asil i sugaton id Pibatosan Malaysia 1963 (MA63).
Ka disio, sundung disio do wagu nogi’ nosili Luguan Montiri koporintaan Perpaduan solinaid sontoun sitanga’ nga’, pinoingkawas disio kopoobian montok Sabah miampai pinomoruhangan RM4 bilion, bobos akawas id suang pogun.
“Haro puru Parlimen mongobi’ koporintaan Perpaduan nga’ moboros miagal Pas om Parti Pribumi Bersatu Malaysia (BERSATU), amu’ oku koilo. Somoonu’ mongumpilin kasaga’ nga’, soira’ moboros kaagal-agal do olimon tokou, maan tokou paada’ adao’ (Sabah).
“Kinopoobian montok Sabah agayo, i oponsol salasaion tokou kobolingkahangan mogigiyon miagal lotirik, waig, ralan, sinonong sikul om tulun mosikin. Iti i tingkananon tokou om ilo’ karaja’ koporintaan Pisompuruan om pogun miupakat montok manalasai.
“Kada’ podulio’ tulun mingangau id labus, tonggungan tokou montok mongobi’ konosipan mogigiyon. Id haal pisompuruan Ramai Kaamatan diti, onuon ku kosiwatan, mimang do rumikot oku, oilaan ku pogulu diti aiso’ Luguan Montiri tumindapou sabab opurimanan ku do yoho’ sumili lansanon pomogunon diti i opurimanan do aanu monungkayan om mongobi’ koinsanai tinaru,” ka disio.
