Hajiji minananud di Anwar pinopowonsoi ababayan “Popoo’pi Pa’ai doid Tangkob” id Ramai Pinomupusan Pamaramaian Ramai Kaamatan Nayatan Pogun Sabah 2024.
PENAMPANG: Koporintaan Pogun maya’ Kotinanan Koubasanan Pogun Sabah popoindalan pipiro ababayan koubasanan di oponsol toun diti, montok papatantu’ tungkusan koubasanan om kosonian mogigiyon nokoiyonon aanu momogompi’ mantad sinakagon kumaa sinakagon.
Boyoon Montiri, Datuk Seri Haji Hajiji Haji Noor minoboros, wookon ababayan dilo’ nopo “Koburuon Mogigiyon” (Pembangunan Komuniti) maya’ modul Protokol Koubasanan Mogigiyon i kapanahak koundaran kumaa tinimungan totombuluyon labus kakadayan id kopoingkawasan ponguludan om ponompuanan ponombuluyan koubasanan i kitopong pomogunan.
Suai ko ilo’ ka disio, projik mongingkawas asil nimbulayan ponombuluyan id Longkod Koubasanan Murut Tenom nga’ poindalanon nogi’ do toun diti, suai ko’ papagaras Cultural PitStop (CPS) i poinsumpak id Tawau, Kota Belud, Sandakan, Tenom kaampai tolu po kinoiyonon suai ilo’ nopo nga’ Dataran Wisma Budaya, Ranau om Keningau.
“Ababayan ngaawi’ dilo’ kituduan papatantu’ tataba’ i tinungkusan diti aanu momogompi’ mantad sinakagon kumaa sinakagon,” ka disio id Ramai Pinomupusan Pamaramaian Ramai Kaamatan Nayatan Pogun Sabah 2024 id Lintuhun Hongkod Koisaan Koubasanan KadazanDusun (KDCA) do hiti, di tadau baino’.
Luguan Montiri, Datuk Seri Anwar Ibrahim pinopohimagon pinomupusan ramai dilo’. iti nopo nga’ i kumoinduo di Anwar tuminindapou id Ramai Kaamatan Nayatan Pogun.
Hajiji minananud di Anwar pinopowonsoi ababayan “Popoo’pi Pa’ai doid Tangkob” id Ramai Pinomupusan Pamaramaian Ramai Kaamatan Nayatan Pogun Sabah 2024.
Hajiji minoboros, pamaramaian Ramai Kaamatan kopihunung kopio di ingisaman Koporintaan montok papabantug tungkusan koubasanan om kesenian mogigiyon nokoiyonon.
“Kopuriman tokou nogi’ do pinuawang kinoubasanan id kopogisusuaian tinaru nopo nga’ tataba’ oponsol id siktor ponombuluyan i tilombuson momogompi’ ontok otungkusan sinakagon dumontol.
“Ilo’ pogi’, Koporintaan Pogun mokodung kopio inggisaman popoinggayo om momupus kinoubasanan nogi’ kesenian tikid tinaru maya’ koisaan sompoopori mooi do tungkusan koubasanan kigatang diti kotilombus,” ka disio.
Minoboros isio, Koporintaan Pogun maya’ Komontirian Pomutanaman, Ponginsadaan om Pomorunan Takanon Sabah (MAFFI) tumilombus tumopot miampai inggisaman mongingkawas rontob kosukupan tinan asil pomutanaman lolobi no parai montok monginggirot kojominan takanon, kosuul no asil wagas.
Kohondot dilo ka disio, di tulan Kaapat katatalib Kabinet Pogun nakaakun minanampasi kawagu Kotinanan Parai om Wagas Sabah sabaagi wookon laang mongingkawas kopolobusan nogi’ koumoligan takanon id pogun diti, suai ko’ pinopoindalan pipiro inggisaman suai montok mongingkawas rontob kosukupan tinan (SSL).
Ka disio, inggisaman diti kaampai no manahak koposotolan kumaa kopoburuan parai tana’ otuu (pananaman parai tidong) do toun diti, sabab Koupisan Pomutanaman Sabah (JPS) kiharo soginumu’ 404 ponit parai tidong id ‘gen bank janaplasma’ parai.
Hajiji minoboros, tumanud pinongintoban JPS di toun 2021, pikikiro kiginayo 13,733 hektar koiyonon tinanaman para tidong kapaampai 17 watas id poliliput Sabah wookon dilo’ id watas Ranau, Tongod, Kota Marudu, Penampang, Tuaran, Nabawan om Pitas.
Ka disio, karamaian Ramai Kaamatan suai ko’ koiyonon popointanga’ koubasanan om seni mogigiyon KDMR id pogun dti, nga’ koponompuru oinsanan mogigiyon amu’ momuntuk tinaru, ugama’ om koubasanan id pogun diti.
“Sabab dilo’, pisompuruan id kopogisusuaian tinaru, koubasanan nogi’ kotumbayaan ugama’ id Sabah nopo nga’ posunduran oponsol i nuru’ do gompion om umoligan do mogigiyon pogun diti. Iti sabab no piuludan om kopogisusuaian wotik i nokoposili Sabah olumis nogi’ poinsusuul suai ko’ pasanganu kinolumison koubasanan om kesenian di poinpoopori.”
“Kiguno tokou papatanom id ginawo sorompoopori do miampai no kaadason om pisompuruan i koowit pomogunon om mogigiyon dau koburu’potilombus dino pantangon do nayatan sompomogunan,” ka disio.
