Dr. Joachim (id dohuri, tanga’) miampai di Jonathan Yasin (dohuri, koduo wanan) suminasi’ pinialanan MoU id pialatan Koupisan Ponginsadaan nobian di Azhar (gibang) om mobi’ Puruankuasa’ Sistem Tagal, OKK Muhasip.
RANAU: Koupisan Ponginsadaan Sabah gisom noondo diti nakapanain Memorandum Pihunungan Tagal (MoU Tagal) miampai 31 puruankuasa’ tagal id pogun diti, kaampai 12 puruankuasa’ id Ranau.
Siam mantad puruankuasa tagal dilo’ id watas diti nopo nga’ i kaawagu suminain MoU Tagal miampai koupisan dilo’ id iso’ ababayan pinapanau id Longkod Informasi Tagal Ranau doid Kampung Luanti do hiti di tadau baino’, sinasi’ di Kumoduo Boyoon Montiri II, Datuk Seri Dr. Joachim Gunsalam.
Ilo’ nopo nga’ kapaampai Tagal Kg. Gana Gana, Tagal Kg. Lobou Lama, Tagal Kg. Tompios, Tagal Kg. Kilimu, Tagal Kg. Togop Darat, Tagal Kg. Lobou Timbua, Tagal Kg. Nalapak, Tagal Kg. Perancangan om Tagal Kg. Paus.
MoU Tagal nopo nga’ iso’ nota pisokodungan pialatan goduduo bohogian, i kapasaga’ Koupisan Ponginsadaan Sabah papamanau tonggungan sabaagi monontuduk teknikal, miontong naangayan sistem tagal di poinharo mantad, popiondalan ponolidikan (R&D) kumaa koponginsonongan po do sistem tagal om popointutun ababayan ekoponombuluyan id koiyonon tagal, naamot puruankuasa’ tagal nopo kitonggungan id koponguludan kasalaan om danda’, mongulud tadau-adau koiyonon tagal om poporuput kointalangan (data) kopotindalan asil ninsadaan nogi’ kinopomogombitan kumaa Koupisan Ponginsadaan Sabah.
Tagal i nakasain MoU miampai Koupisan Ponginsadaan kosudong mamaramit ponguhupan kogogonopan miagal kogogonopan sulap om pagagawasan nogi’ susuai ponguhupan tumanud di kopoopuan do haro om kolulusan mantad Puruankuasa’ Ponguludan Sistem Tagal Koupisan Ponginsadaan Sabah. Tongo’ ponguhupan kakamot miagal papan tanda om tuung sada’ nga’ aanu nogi’ upalaion.
Dr. Joachim (tanga’) suminasi’ kinapatahakan ponguhupan kumaa Puruankuasa’ Tagal Kg. Luanti mantad Koupisan Ponginsadaan Sabah i nobian di Azhar kumaa di Ponorikohon Koisaan Tagal Ranau, Noorhayati Robert @ Assry.
Minanangkabayahan kumaa Koupisan Ponginsadaan Sabah mantad koinsanai ninggisaman di minaan onuo’ id kopoburuan po do sistem tagal id Sabah nogi’ puruankuasa’ tagal di poinggompit, Dr. Joachim po nogi’ ADUN Kundasang minoboros, pisokodungan id pialatan Koupisan Ponginsadaan Sabah om tongo’ puruankuasa’ tagal id siriba’ ababayan MoU diti tantu’ no do koponginsonong om kopoburu’ po do koponguludan tikid tagal di poinggompit.
Dr. Joachim minoboros, Koupisan Ponginsadaan i po noig’ iso’ mantad koupisan id siriba’ Komontirian Pomutanaman om Ponginsadaan Sabah, minaganu inggisaman pointonod di toun 2002 montok popoburu’ om monginggirot po do kopoindalanan sistem tagal.
Tumanud disio, id siriba’ inggisaman dilo’ Koupisan Ponginsadaan Sabah kosili monontuduk teknikal kumaa koinsanai puru puruankuasa’ tagal id tikid watas om popointutun sistem tagal kumaa watas ngaawi’ i amu’ po nokopoindalan sistem dilo’.
Koupisan Ponginsadaan nga’ pinopointutun nogi’ do konsep ‘pengezonan’ koiyonon tagal ilo’ nopo nga’ zon otomou (koponginsadaan di pasagaon po’ompus toun), zon osilou (koponginsadaan kitimpu) om zon aragang (koponginsadaan nopo nga’ amu’ pasagaon).
“Konsep pengezonan diti winonsoi mooi do koponguludan intodonon sada’ baang aanu popoindalan miampai lobi kosonong om oulud,” ka disio pinopointalang.
Tumanud di Dr. Joachim, id timpu diti haro 126 tagal id Ranau i po nogi’ watas di bobos ogumu’ tagal id Sabah om nogi’ watas i kiharo tagal ekoponombuluyan bobos ogumu’ id pogun diti.
“Bayahan kumaa watas Ranau i nointutunan di sistem tagal. Kopuriman hal dilo’, Koupisan Ponginsadaan Sabah minonuridong songinan Longkod Kopointalangan (Informasi) Tagal id Kampung Luanti, Ranau sabaagi iso’ longkod pinsingilaan om kopoilaan kumaa tulun ginumuan karait di hal ngaawi’ ponguludan ababayan tagal,” ka di Dr. Joachim.
Sistem tagal i kapaampai kogompitan mogigiyon om maya’ ababayan tagal, nindopuan mogigiyon labus kakadayan aanu mongingkawas mantad haro asil ninsadaan di ogumu’, ababayan tagal ekoponombuluyan miagal do mogigianak di sada’ okohup, momukiim om sipoot magapon.
“Kopuriman songkuro koponsol konsep om tuduan sistem tagal diti, Komontirian Pomutanaman, Ponginsadaan om Pomorunan Takanon Sabah pinapatatap 10 tinan tagal do toun 2023 sabaagi iso’ ‘Key Performance Index (KPI’ Koupisan Ponginsdaan Sabah. KPI tagal diti nosigampot no, om Koupisan Ponginsadaan Sabah nga’ nakaanu minonuridong soginum’ 14 tagal di wagu, nakatalib 40 pihatus mantad rikoton di pinatatap. Iti nokopokito konsep tagal diti nakaanu kopio raramit osonong doid mogigiyon.
Dr. Joachim (gibang) pinapatahak ‘saguhati’ kumaa susumikul ‘cemerlang’ montok toun 2022 Kg. Paus, Ranau id Ababayan Suminain MoU Tagal id pialatan Koupisan Ponginsadaan om 9 Puruankuasa’ Tagal.
Suai ko’ sabaagi iso’ sistem montok mongumolig, mononduli’ gompi’ om mongulud sistem ponginsadaan baang, ka disio, sistem tagal nga’ nakalantoi nosili iso’ asil ponombuluyan di nakalantoi id Sabah.
Dr. Joachim lumansan mooi tikid nayatan mogigiyon kosuul no id watas Ranau kaanu mongingkawas ikonomi om potilombus dino lumabus mantad komosikinan kadala’.
Id ababayan dilo’, pinopotunui po nogi’ i Dr. Joachim do ponguhupan Koupisan Ponginsadaan Sabah kuminaa di 9 Puruankuasa’ Tagal, kinapatahakan songinan pagagawasan om ‘walkway’ kitaap kumaa Tagal Kg. Luanti, kinapatahakan ‘saguhati’ kumaa tongo’ susumikul ‘cemerlang’ montok toun 2022, Kampung Paus, Ranau om kinoponungkapan kumaa di nakalantoi ‘sukaneka’ tagal.
Nokotindapou nogi’ i Puru Parlimen Ranau, Datuk Jonathan Yasin; Potunud Ponginsadaan Sabah, Azhar Kassim; Monguasa’ Ponginsadaan Watas Ranau, Tamlie Raiman; Luguan Watas Ranau, Luguan Watas Ranau, OKK Muhasip Roman; Luguan Pulis Watas Ranau, DSP Simiun Lomudin; Ponorikohon Tagal Kg. Paus i minongobi’ 9 Puruankuasa’ Tagal, Julie Yabi om Monguhup Upisor Watas (Kopotundaan) Farihah Mohd. Jamian.
