Hajiji Haji Noor
KOTA KINABALU: Koporintaan Pogun maya’ Komontirian Pomutanaman, Ponginsadaan om Pomorunan Takanon Sabah (MAFFI) do noondo id karaja’ monuridong kawagu Kotinanan Parai Sabah (Lembaga Padi Sabah) montok popoburu’ pomorunan parai om wagas id pogun diti.
Boyoon Montiri, Datuk Seri Hajiji Haji Noor minoboros, koponuridongan kawagu Lembaga Padi Sabah dilo’ pikikiro kopongingkawas rontob Kosukupan Tinan (SSL) wagas pogun Sabah kumaa 60 pihatus dumontol toun 2030.
“Do noondo, SSL wagas pogun Sabah id rontob 22 pihatus naamot 78 pihatus kopomogunaan wagas id pogun diti tompungon maya’ wagas nudar mantad pomogunan ngaawi’ miagal China, Vietnam, Thailand om Pakistan.
“Kalansanan otkou mantad ponuridongan kawagu Lembaga Padi Sabah pikikiro kopongingkawas rontob SSL wagas pogun potilombus idno kopongingkuri’ wagas nudar,” ka disio ontok pinopoimagon Tadau Momukabun, Momutayam om Monginsada’ nayatan pogun Sabah 2023 id Wisma Pertanian do hiti di tadau baino’. Teks boboroson disio binasa’ di Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan.
Daamot dilo’, Hajiji minoboros, momukabun, momutayam om monginsada’ nopo nga’ tinimungan di oponsol doid koponguhupan kumaa kopoburuan ikonomi pogun om potilombus dino pomogunon.
Kohondot dilo’ ka disio, momukabon, momutayam om monginsada’ mositi’ opoduli’ om posodia’ mamaramit nogi’ momonsoi kosimbanon id pomutanaman kaampai no koponguludan kabun maya’ kaawagu (moden).
“Momukabon, momutayam om monginsada’ kiguno lobi ‘inovatif’, mongingkawas kabaahan om minggisom miampai lobi kopinogot do monongkisolod tongo’ kosiwatan kopoopuan id siktor pomutanaman i nokoinggayo.
“Montok mamagampot angkab diti, kiguno tokou poingkukab kumaa tuwa’ pomusarahan di wagu om tongo’ kointalangan di wagu om doun kaawagu nogi’ kaanu popihunung dilo’ tumanud koyuon om timpu. Mositi’ tokou sumili songulun momukabun, momutayam om monginsada’ di ogumu’ toilaan,” ka disio.
