Joniston Bangkuai
KOTA KINABALU: Parti Bersatu Sabah (PBS) momonsoi ponorisidan poinpuli di naangsayan dau id Pomilian Agayo Pogun Sabah ko-17 id Pitimungan Mongongobi’ Toun-toun PBS ko-40 i kapanau do ko 17 om 18tw Kohopod om Duo diti id Lintuhun KDCA, Penampang.
Luguan Kopointalangan PBS, Datuk Joniston Bangkuai minoboros, pitimungan kilinaid duo tadau dilo’ koponimung tongo’ mongongobi’ mantad pototongkop Sabah om pohimogonon di Ponowoli Presiden PBS, Datuk Seri Dr. Joachim Gunsalam.
Ka disio, suai ko’ mogintong naangayan pomilian agayo, tongo’ mongongobi’ nga’ mogiboboros nogi’ di katatapan om atag kopohompit inggisaman momusus tongo’ kopotutan Sabah id siriba’ Pibatosan Malaysia 1963 (MA63), suai ko’ mamalan ponginsomokan montok monoibau ngaawi’ kobolingkahangan rayat miagal koburuon infrastruktur, kos balanja’ masi om kosiwatan ikonomi.
Id pomilian agayo pogun i pinaharo di ko 29tw Kosiam katatalib, PBS nonuan do 15 timpohon om nakalantoi do turu’ timpohon, ilo’ nopo nga’ Kundasang, Matunggong, Kiulu, Tandek, Lumadan, Telupid om Limbahau.
Ka di Joniston, pitimungan diti baino’ kopokito nogonop 40 toun kinopimburuan PBS id popoburu’ koponsolon om kopotutan rayat Sabah.
Ka disio kawagu pitimungan dilo’ kosili iyonon oponsol montok parti mogintong pinamanahan pointonod pinonuridongan dilo’, mamarati kaantaban pulitik om sosio ikonomi maso-maso, nogi’ papatantu’ sondikoton PBS montok monoguang timpu dumontol.
Dr. Joachim nga’ popoimagon nogi’ kopongukaban mitonggoi Pitimungan Mongongobi’ Komulakan om Koonduan PBS do ko 17tw Kohopod om Duo, susuhutonon Pitimungan Mongongobi’ Toun-toun PBS do ko 18tw Kohopod om Duo i pikikiro otindapou di nuludan kopomuruanan parti, mongongobi’ nayatan siriba’ om nogi’ tombului naalap.
Ka di Joniston, pitimungan diti baino’ pohoroon mamaso PBS potilombus papapanau tonggungan oponsol id koporintaan Gabungan Rakyat Sabah (GRS), popouhup kumaa kaadangon pulitik om koburuon pogun.
“Kopiongoi di pamaramaian 40 toun pinonuridongan dilo’ om lumaan kumaa dekad (tomon) kolimo, PBS tumilombus momusus koponsolon Sabah, posiau koburuon poinpuli om nogi’ papatantu’ rolou rayat kotilombus oonuan pomodulianan,” ka disio.
