Hajiji miampai lansanon komponen GRS pinopokito Manifesto GRS id ramai kinopoimpuunan.
KOTA KINABALU: Boyoon Montiri i po nogi’ Ponorikohon Gabungan Rakyat Sabah (GRS), Datuk Seri Haji Hajiji Haji Noor pinoposotol do piomungan dilo’ potilombus ogirot om agaras sundung haro wookon lansanon i minongiduan parti dumontol Pomilian Agayo Pogun Lintuhun Undangan Pogun (PRU DUN) Sabah ko-17.
Minoboros isio, laang pipiro tulun i minomili’ montok minundaliu parti toi tuminanding sabaagi calon Bebas nopo nga’ kopotutan diolo’ sompoopori, nga’ ilo’ amu’ nokoponginraag ginaras GRS id koponoguangan pomilian agayo.
“GRS kakal ‘intact’ (ogirot), kakal agaras. Haro i minundaliu parti, haro i suminili calon Bebas, ilo’ kopotutan diolo’. Nga’ amu ilo’ nokopomiraag ginaras GRS id pomilian agayo diti baino’. Yati’ nga’ haro nogi’ karalano’ poinpoopori,” ka disio kuminaa media katalib pinopoimpuun Manifesto GRS id Longkod Konvensyen Sompomogunan Sabah (SICC) do hiti, di tadau baino’.
Hajiji minoboros dilo’ soira’ nuhot karait kinoburuon kaawagu kopohompit pipiro bohogian i suminunsuri mantad piomungan atantu’.
Karait calon Pakatan Harapan (PH) i minomonsoi kootusan suminunsuri, ka disio, haal nopo dilo’ nga’ pitorinaan PH om amu’ asaga’ minongomi anaru.
“Ilo’ suminunsuri yau, ilo’ parti PH. Amu’ oku asaga’ mongumin,” ka disio.
Poingkuro po, amu’ i Hajiji minagada’ kopikiikiraan do laang dilo’ kapanahak kosuulon kumaa GRS id timpohon di ponongkialaan.
Pinoposotol isiod o tingkananon GRS noondo nopo nga’ montok papatantu’ kaadangon pulitik, kotilombuson koburuon, nogi’ koonuan mandat agayo mantad rayat Sabah.
