Hajiji miampai di Anwar kuminakap nogompitan liyud id Longkod Poundolihan Naamot (PPS) id Sikul Kabansaan St. Paul, Kolopis, Penampang di tadau baino’.
KOTA KINABALU: Luguan Montiri, Datuk Seri Anwar Ibrahim di tadau baino’ pinapaharo kinotombuluyan karaja’ sitanga’ adau montok minooi intong koyuon kadaat liyud om tana’ nopiang i nokopohompit pipiro kinoiyonon id pososorili’ Penampang om Kota Kinabalu.
Kinotombuluyan dilo’ naampai nogi’ di Boyoon Montiri, Datuk Seri Haji Hajiji Haji Noor i minananud di Anwar minooi intong waya’ kadaat nogi’ koyuon nogompitan id Longkod Poundolihan Naamot (PPS).
Hajiji miampai di Anwar minooi intong bagas tana’ notuhan id Institut Pinsingilaan Mongingia’ (IPG) Kampus Gaya, Kota Kinabalu.
I Anwar minonimpun kinotombuluyan miampai minooi intong koiyonon tana’ notuhan id Country Heights, Penampang i nokopomiraag wookon pongiingiyonon mogigiyon.
I Anwar talib dilo’ minonilombus kinotombuluyan kuminaa PPS Kolopis id Sikul Kabansaan St. Paul, Penampang, i nokopo’iyon nogompitan liyud mantad Kampung Sarapung om Kampung Kolopis.
Suminiwat nogi’ isio monongkirumo miampai di nogompitan id PPS Kampung Sarapung minokongou sondiri’ komi om kogugunoon diolo’.
Suai dilo’, Luguan Montiri nowit minooi intong waya’ tana’ nopiang id Institut Pinsingilaan Mongingia’ (IPG) Kampus Gaya, Kota Kinabalu, i nokoponinong kotongoban id sunduk koumoligan om infrastruktur kinoiyonon dilo’.
Nokopogulu, i Anwar nokorikot id Terminal 2 Tutubpoon Kapal Sompomogunan Kota Kinabalu, Tanjung Aru kikiro jaam ko 2.15 sodopon miampai kapal pinotomod, sinuau di Hajiji om nuludan kopomuruanan pogun.
Id kinorikotan disio, nonuan isio kopointalangan karait koyuon maso-maso kadaat mantad di Ponorikohon Puruankuasa’ Ponguludan Kadaat Pogun, Datuk Seri Sr. Safar Untong i po nogi’ Monunurat Koporintaan Pogun Sabah.
