KIULU: Ginirot ningkakaton Parti Bersatu Sabah (PBS) poompus susuyan kahandaman dau nosili kointalangan kinotiu’on dau id kinopoburuan rayat Sabah, ka di Luguan Kopointalangan parti dilo’, Datuk Joniston Bangkuai.
Pinosotol disio do PBS toririmo ogirot id kopomususan kopotutan om koponsolon rayat Sabah miampai amu’ mogintong di kinosimbanon koyuon pulitik pointonod pipiro nahapadan toun nakatalib.
Joniston, i po nogi’ Puru Lintuhun Undangan Pogun (ADUN) Kiulu, pinoposusui kawagu poingkuro tongo’ lansanon PBS id dingguluonon do monokiokud di koponoisaan pisompuruan, sundung pia asansagan potoguang kolubukan agayo.
“Kakal tokou osorou di maso lansanon miagal di Tan Sri Joseph Pairin Kitingan, Datuk Seri Dr.Jeffrey Kitingan om Datuk Seri Dr. Maximus Ongkili potoguang kaantaban agayo om nogi’ kinapanahanan tu’ pinopoburu’ kopotutan Sabah.
“Iti no kointalangan kinotiu’on om tonggungan dahai kumaa rayat,” ka disio ontok tuminindapou ababayan sopisuau miampai mogigiyon id Kampung Kotunuan, do hiti, di tadau baino’.
Joniston ontok minoboros kumaa mogigiyon id ababayan sopisuai id Kampung Kotunuan Lama, Kiulu.
Minonilombus kokuasa’an dilo’, ka di Joniston PBS kokito Gabungan Rakyat Sabah (GRS), ilo’ nopo nga’ pogiomungan tongo’ parti nokoiyonon, sabaagi posunduran bobos kitonggungan montok mogowit angkabon Sabah kumaa sogulu.
“GRS nopo nga’ koiyonon do tongo’ rolou nokoiyonon misompuru, om koposodia’ ilo’ do impohon bobos osonong montok papatantu’ kaadangon pulitik suai ko’ popoindalan koburuon montok rayat.
“Id GRS, PBS tumilombus kosili popogura’ agayo id kopoburuan angkabon rayat Sabah nogi’ potilombus ogirot id pisaan om kinotiu’on dau popoburu’ kopongobian rayat,” ka di Joniston pinoposotol i po nogi’ Luguan Kopointalangan PBS.
Nokunan po nogi’ disio kopomuruanan di Boyoon Montiri, Datuk Seri Haji Hajiji Haji Noor, id kinoponompuruan tongo’ parti ngaawi’ nokoiyonon id siriba’ dolundung GRS.
“Yati’ do noondo id timpu sopisuai, om sunduan GRS nopo nga’ karait do pisompuruan nogi’ piuhupan montok timpu dumontol Sabah. PBS pointopot papamanau tonggungan dau miampai komponen suai sabaagi ponokotambalut id koponuridongan kaadangon po’ompus om komogoton kirati montok Sabah,” ka disio.
