Haji Hajiji Haji Noor
KOTA KINABALU: Koporintaan Pogun minoningkod kapamaramaian nayatan pogun Tadau Malaysia i pinoulud kapanau totuong suab id Padang Merdeka nosusuhut kokusutan kadaaton poinpuli gama-gama’ gompus i nokoponginggorit sokukuri’ turu’ watas id Sabah.
Boyoon Montiri, Datuk Seri Haji Hajiji Haji Noor minoboros, pinoilo disio haal dilo’ kuminaa di Molohingon Agayo Pogun Sabah, Tun Musa Aman di tadau baino’.
“Tingkananon tosikap nopo koporintaan pogun nga monoguang do kokusutan, mongulud inggisaman mononduli’ nogi’ papatantu’ karaja’ monumpasi koindalan do kohunung timpu dau montok monguhup mogigiyon di noumpadanan.
“Id timpu koinggoritan diti, kasasanangan, kotundunan nogi’ koumoligan rayat nopo nga’ bobos oponsol. Koinsanai timbabaon om kogoogonopan mositi’ no do kumaa diolo’ di naantakan,” ka disio.
Minonuhu’ nogi’ i Hajiji di Puruankuasa’ Ponguludan Kadaaton Pogun (JPBN) mooi toririmo id koyuon do sumoosodia’ om maganu laang osikap tumanud koyuon maso-maso i kakal pointoguang koyuon tawan di araat.
Puruankuasa’ i nirikohon di Monunurat Koporintaan Pogun, Datuk Seri Sr. Safar Untong do noondo papaharo mitingan po’ompus timpu montok miontong-ontong koyuyuon om mongulud karaja’ osikap doid watas ngaawi’ di naantakan.
Boyoon Montiri minokianu tulun ginumuan do monidsorou, mananud ponuhuan koumoligan om manahak sokodung poinponu’kumaa tinimungan manampasi nosusuhut inggisaman manampasi i masaan ingkawasan doid pototongkop pogun.
