Hajiji pinapatahak Gaa’ Tokoh Maulidur Rasul bohogian kokusaian kuminaa di bagas Monunurat Koporintaan Pogun, Datuk Seri Hashim Paijan.
SANDAKAN: Boyoon Montiri, Datuk Seri Haji Hajiji Haji Noor minagangat tulun Islam id pogun diti toririmo mamarati pogogoyuon (sirah) di Nabi Muhammad SAW okon nopo ko’ id boros om kapamaramaian toomod, nga maya’ nubasanan koposion sangangadau sabaagi tulun di kitonggungan om popowonsoi di osonong montok no do ugama, tinaru om pogun.
Minoboros isio, pamaramaian diti okon ko’ momuhondom nopo susuyan kinohodion di bontugon (junjungan) agayo Nabi Muhammad SAW, nga nogi’ sabaagi kopokitanan kopongupusan kumaa di baginda SAW, nogi’ tonggungan montok tumilombus posili ‘sunnah’ Baginda om Islam sabaagi Ad-din id koponuridongan mogigiyon madani di koburu’, asanang om kipogoyuon osonong.
Hajiji pinapatahak Gaa’ Tokoh Maulidur Rasul bohogian koonduan kuminaa di Potunud Yayasan Kotundunan Sabah (YKS) i po nogi’ bagas Kumoduo Monunurat Koporintaan Pogun (Pentadbiran), Datuk Diyanah Abdullah.
“Rasulullah SAW minonuridong mogigiyon Madinah miampai impohon keimanan, kaadangan sosial om pisompuruan pogialatan tinaru. Iti no ombitanan i apatut turianan om pisudongon di koyuon Sabah sabaagi songinan pogun i opuawang do kopogisusuaian tinaru, koubasanan om ugama’.
“Otumbayan oku, maya’ do piuhupan ogirot pialatan koporintaan, kotinanan ugama, tinan okon koporintaan om oinsanan nayagan mogigiyon, kaanu tokou monuridong ‘umat’ madani di kiginoris monokitopong, kipogoyuon osonong om kitoilaan; nogi’ misompuru kumaa komogoton om kobontugan pogun Sabah di koupusan,” ka disio id Ramai Pitimungan Pamaramaian Maulidur Rasul SAW Nayatan Pogun Sabah 1447H/2025M i pinoimagon di Molohingon Agayo Pogun Sabah, Tun Musa Aman id Lintuhun Mogigiyon Sandakan, do hiti di tadau baino’.
Daamot nogi’ dilo’, i Boyoon Montiri minoboros, koporintaan pogun tumilombus popoinparagat balajaran ugama’, ponginggirotan kotinanan Islam, nogi’ kapagarasan sukod wagu kokusaian om koonduan, kopiongoi di Sondikoton Sabah Maju Jaya (SMJ) i poposotol do Koburuon Modal Insan.
“Kohondot dilo’, uhu Pamaramaian Maulidur Rasul SAW toun diti ilo’ nopo nga’ ‘Membangun Ummah Madani’ kopiongoi kopio di kaantaban nogi’ angkabon i igitan tokou sabaagi rayat id songinan pogun di mogisuai tinaru miampai kopogisusuaian adat om koubasanan, nogi’ opuawang do intodonon sandad.
“Ilo’ po nogi’ kopokito ababayan oponsol koporintaan id koponuridongan mogigiyon di miadas id sunduk ‘spritual’ om ‘material’; mogigiyon i moningguun koyuyuon osonong Islam id sunduk komogoton, koburuon om nogi’ pisompuruan,” ka disio.
Pinopoilo nogi’ isio do koporintaan pogun nga’ pinapatantu’ ababayan pamaramaian Maulidur Rasul nayatan pogun maan owito’ kumaa watas di suai kosuul no kakadayan agayo id pogun diti.
“Iti kirati ababayan pamaramaian okon i ko’ korubpu’ no id longkod pogun nga nogi’ id watas om kakadayan agayo doid pogund iti. Inggisaman diti manahak kosiwatan kumaa mogigiyon nokoiyonon kaanu tumanud om maganu bohogian id pitimungan om pinghuyudan di kirati kopio diti, miampai di tongo’ lalansanon pogun.
“Konihab (tadau Kaapat) kikosiwatan oku minooi intong ponuridongan Longkod Islam Sandakan. Ponuridongan kompleks diti nopo nga’ pomusarahan di Molohingon Agayo Pogun, Tun Musa Aman di maso disio nosili Boyoon Montiri di toun 2017. kohondot dilo’, kompleks diti okon ko’ kosili no do tanda’ kointutunan id kakadayan diti nga nogi’ koposimbuat syiar Islam id pogun diti.
“Insya-Allah, Sandakan diti, tilombuson tokou poburu’, kopiongoi di palan koburuon Sondikoton SMJ, i moningkanan koburuon di po’ompus om kopotonggoi ngaawi’, lolobi no Sandakan, sabaagi kakadayan koduo bobos agayo id Sabah, i kikosiwatan akawas montok tilombuson popoburu’ id mogisuaian siktor, kosuul no balajaran, ponombuluyan, pongindopuan om pidagangan,” ka disio.
