TUARAN: Limo kusai naamot songulun po kawagu natampasi id kinoligaganan talun-alun kopohompit songinan luri treler om padsakaian mogisuaiguno (MPV) id Ralan Sulaman Gayang, doros Longkod Pintoriningan Rela Tuaran, di sodopon baino’.
Mononomboros Longkod Gerakan Operasi (PGO) Koupisan Bomba om Monumpasi Malaysia (JBPM) Sabah minoboros, bohogian disio nakaramit pamalahawan agagou maya’ numbur MERS999 di jaam ko 2.09 sodopon pogulu songinan injin FRT miampai siam puru mantad Balai Bomba Kota Kinabalu pinoongoi id kinoiyonon kinaantakan kisinodu’ 29 kilometer.
“Id kinorikotan tinimungan bomba di jaam ko 2.50 sodopon, nokito naantakan kinoligaganan kopohompit songinan treler om songinan MPV i nokopitahub pogulu nakasabpir id tisan ralan.
“Haro onom nohompitan di nakaampai. Limo kusai i poinsakai MPV naansip id suang padsakaian om naanu pinapalabus minomoguno kakamot pinotomod ‘rescue tools’,” ka disio id kointalangan di tadau baino’.
Ka disio, koinsanai nohompitan i pinosoliwan pinoimagon noiduan ginawo id kinoiyonon kinaantakan di pakakaraja’ Komontirian Kolidasan Malaysia (KKM) pogulu pinatahak kumaa pulis montok laang potilombus.
“Doribal luri treler poingkuro po amu’ nopikukurayan,” ka disio.
Karaja’ i binuruan di Komander Operasi PBK I Masri Gari pinupusan poinponu’ di jaam ko 3.20 sodopon soira’ koyuon ponoimagon do oumolig.
Minonguhup nogi’ id kinoiyonon o puru pulis om tinimungan pongubatan KKM.
