Dr. Joachim minongobi’ di Boyoon Montiri pinopoindalan tanda’ kinopoimaganan miampai minonuntung tagung do inturu’ om sinasi’ dii Rubin om tombului apantang suai.
TENOM: Mogigiyon id pogun diti, kosuul no sukod wagu suhuon do momit sunduan ninggisaman kobilangan Murut nointutunan, Datuk Seri Panglima Ontoros Endoi @ Antanom sabaagi intodonon pongunsuban montok monginggirot pisompuruan om momusus bantug pogun.
Boyoon Montiri (KM), Datuk Seri Haji Hajiji Haji Noor minoboros, Antanom okon nopo ko’ ponokokitanan kinobulunon mogigiyon Murut nga’ kobilangan ouli’ i mininggisom momusus kopotutan oinsanan tinaru amu’ momuntuk tinaru.
“Kinopoburuan di Antanom okon ko’ mimpau kopurimanan tinaru, nga montok mongobi’ kopotutan om bantug oinsanan mogigiyon id timpu dau. Ginawo dau lobi kagayo ko’ mantad pisuayan tinaru,” ka disio id limunduk Pamaramaian Ramai Ilau Kalimaran Ko-19 id Dataran Pekan Kebamong di konihab. Teks boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian Pogun, Datuk Seri Dr. Joachim Gunsalam.
Hajiji minoboros, ninggisaman di Antanom nokopokito songkuro ginayo gatang songinan pogun om gatang kinoulunon rayat i apatut do gompion.
Ka disio, sundung nosusu sabaagi kobilangan Murut, sunduan kopongobian om kolubukan disio kumaa pgoun diti nuru’ songonuan oinsanan rayat Sabah.
Pinosotol disio, Tenom i noondo diti nokoburu’ sabaagi songinan watas mogisusuai tinaru kotilombus no do kotunda’ nung rayat dau poposuul piuludan om kaadangon pulitik.
Ka disio, ginaras pisompuruan om kopogisusuaian koowit kotumbayaan om pamantangan kumaa Sabah id nayatan nasional, potilombus dino kapatantu’ korikotan komogoton ikonomi aramit miampai aadang om poinpuli.
“Sabah nopo nga’ walai tokou. Walai diti atamangan no do poinsonong nung uludon do kopomuruanan i ototopot karati om poingginawo angkab rayat dau,” ka disio pinoposotol.
Hajiji nga’ pinoposotol nogi’ do kaadangon pulitik nopo nga’ haal oponsol montok papatantu’ kotontuan koburuon pogun aanu popoindalan miampai oturundus, kopiongoi di Sondikoton Sabah Maju Jaya (SMJ).
Minoboros isio, tungkusan koubasanan nuru’ do pususon om minagangat sukod wagu papamanau tonggungan aparagat momogompi’ seni, tadat om tungkusan komolohingan mooi do amu’ atagak osoibahan kinoiwoguan.
“Kinomogoton tiknologi amu’ apatut silihon padaahan do papaada’ tungkusan i nosili kointutunan mogigiyon. Koyuyuon kinolumison koubasanan mositi’ potungkusan mantad iso’ sinakagon kumaa sinakagon posusuhut. Sunduan “Walai Tokou, Yati’ Tumamong’ nuru’ tilombuson posindak,” ka disio.
Ka disio, koporintaan pogun toririmo monokodung kopongonjuran kapamaramaian koubasanan miagal Ramai Ilau kalimaran tu’ okon nopo ko’ kapabantug tungkusan, nga’ kopoinggirot ginirot kinoinanon rayat Sabah sabaagi songinan mogigiyon orukut tinaru di oulud.
Hajiji minoboros, ramai dilo’ nosili nogi’ koiyonon posindak sunduan kopogiagalan om sopipantang id nayatan rayat mogisusai tinaru, potilombus dino kopoinggirot nimpohon kaadangon pulitik om komogoton pogun.
