Dr. Mohd. Arifin minongobi’ di Boyoon Montiri pinapatahak gaa’ kuminaa mamaramit id Ramai Kopongokunan Naangayan Akawas Akademik (MEKAR) Ko-13.
KOTA KINABALU: Koporintaan pogun tumilombus moningkanan koburuon balajaran miampai pinopoobi’ RM1.33 bilion montok mogisusuai ababayan om inggisaman balajaran po’ompus timpu toun 2021 gisom 2025.
Boyoon Montiri, Datuk Seri Haji Hajiji Haji Noor minoboros, soginumu’ RM848.26 riong pinabalanja’ montok mogisusuai ponguhupan balajaran, naamot RM485 riong po pinoobi’ kosuul montok koburuon ‘modal insan’.
Ka disio, montok timpu di miagal, soginumu’ 14 inggisaman wagu kigatang RM164.14 riong nakapanahak koundaran kumaa kikiro 210,918 susumikul id pototongkop pogun.
“Kalantaion akademik okon i ko’ kalantaion no do sosongulun nga’ ‘aset’ oponsol pogun. Koporintaan pogun pointopot papatantu’ aiso’ tanak Sabah oiduanan mantad piromutan balajaran osonong,” ka disio id Ramai Kinopongokunan Naangayan Akawas Akademik (MEKAR) Ko-13 Koupisan Balajaran Pogun Sabah id Longkod Konvensyen Sompomogunan Sabah (SICC), di tadau baino’. Teks boboroson disio binasa’ di Montiri Sains, Tiknologi om Inovasi, Datuk Dr. Mohd. Arifin Mohd. Arif.
Suai dilo ka di Hajiji, koporintaan pogun minonuridong nogi’ Kounsol Balajaran om Pintoriningan Teknikal om Vokasional (TVET) Sabah di ko 19tw Kolimo toun diti sabaagi inggisaman mongulud lobi 160 kotinanan pintoriningan teknikal om vokasional id pototongkop pogun, kopiongoi di kopomogunaan pidagangan karaja’ timpu dumontol.
Ka disio, koporintaan pogun pinapatahak nogi’ ponguhupan tusin tunui RM1,000 kuminaa di 146 susumikul ‘cemerlang’ STPM 2024, suai ko’ songlun susumikul Sabah i nakalantoi id nayatan kabansaan nga’ nakaramit ngoi’ RM3,000 sabaagi tanda’ pongunsikohan.
Hajiji pinoposotol nogi’ koponsolon piuhupan ogirot pialatan koporintaan pogun om Pisompuruan maya’ Komontirian Balajaran montok mongingkawas naangayan om kogogonopan balajaran id Sabah.
“Koporintaan pogun toririmo poingukab do miboros montok monginggirot koburuon modal insan. Balajaran kotilombus sabaagi ‘pasport’ oponsol timpu dumontol tangaanak Sabah,” ka disio pinoposotol.
Boyoon Montiri minokianu nogi’ oinsanan puru balajaran do potilombus pointootopot om miuhup miampai piupakatan id koponuridongan koyuon balajaran di abantug nogi’ kosili turianan do sukod wagu dumontol.
