Hajiji miampai di Johainizamshah pinopokito Palan Koburuon Lamag.
KINABATANGAN: Watas Kinabatangan pikikiro koposurat sinusuyan kahandaman wagu soira’ ponuridongan songinan kakadayan doun kaawagu, pungaranan Bandar Seri Milian, poindalanon sabaagi ponokodung komogoton labus kakadayan om ikonomi rayat nokoiyonon.
Porjik kiwaya’ akawas nopo dilo’ nga’ piuhupan do Kounsol Watas Kinabatangan om monunuridong swasta – SUNMOW Construction Sdn. Bhd., kopohompit ponuridongan mogilolongot id tana’ kiginayo 157.48 ekar id Kakadayan Kota Kinabatangan.
Ramai sumungkad projik dilo’ pinatantu’ do ko 15tw Kowalu’ 2025, jam ko 2 sodopon id Dataran Terminal Poingukab, Kakadayan Kota Kinabatangan, om poindalanon di Boyoon Montiri, Datuk Seri Haji Hajiji Haji Noor.
Linukis artis projik Bandar Seri Milian.
Lansanon Koburuon Mogigiyon (PPM) DUN Lamag, Johainizamshah Johari minoboros, Projik Bandar Seri Milian poindalanon id tolu fasa solinaid timpu 15 toun, miampai Pongiikiraan Gatang Koburuon Kasar (GDV) kiginumu’ RM366 riong.
Koimbayat dilo’ ka disio, koinsanai kos projik bayaran poinponu’ do bohogian monunuridong miampai aiso’ nunu-nunu tonggungan kousinan toi bansar kumaa tana’ pasanganu bohogian kikuasa’ nokoiyonon.
Ka disio, wookon komponen koburuon kopio i pinalan kaampai pomuwalaian doun kaawagu om ogoosan sumanganu, kogogonopan miagal talun-alun, pangaba’ waig om lotirik, longkod kopoindalanan karaja’ wagu Kounsol Watas Kinabatangan, kotinanan balajaran, lintuhun mogigiyon om koiyonon ‘rekreasi’, zon pongindopuan, komersial om pomorunan agaan.
Johainizamshah minoboros, kopoburuan Bandar Seri Milian okon ko’ inggisaman poinginan nopo, nga nosili ponokokitanan tonggungan koporintaan id kopogowitan komogoton do poinpuli kumaa koiyonon labus kakadayan.
“Id siriba’ kopomuruanan di Hajiji, koporintaan pogun kiangkab papatantu’ rayat Kinabatangan karamit kogogonopan ‘moden’, piromutan kosiwatan ikonomi om koyuon koposion di lobi kosonong,” ka disio id kointalangan di tadau baino’.
Ka disio, projik dilo’ kopiongoi di katatapan Sondikoton Sabah Maju Jaya (SMJ) i poposotol piadasan koburuon pialatan kakadayan om labus kakadayan, suai ko’ mamajamin komogoton rayat miampai poinpuli.
Pinopolombus nogi’ isio kotumbayaan do rikod naangayan monunuridong, i kinawawaya’an id koburuon kitukuran agayo nogi’ momoguno intodonon kousinan sondiri, kaanu papatantu’ koturunduson kopoindalanan projik.
“Iti nopo nga’ kopoopuan montok timpu dumontol. Bandar Seri Milian kosili ‘hab’ kosunion wagu i kounsub kopoopuan, mongukab lobi kogumu’ kosiwatan pakarajaan, nogi’ papasarok ekosistem kopongindopuan nokoiyonon.
“Koburuon diti nga’ pikikiro koowit kalabaion sosioikonomi timpu anaru kumaa Kinabatangan, potilombus dino monimban ‘landskap’ watas dilo’ sumili wookon posunduran koburuon wagu Tisan Kosilahon Sabah,” ka disio pinoposotol.
