Hajiji (kotolu, wanan) miampai di Presiden om Luguan Upisor Eksekutif Tinimungan PETRONAS, Tan Sri Tengku Muhammad Taudik suminasi’ pinialanan dokumen pialatan Petronas LNG i nobian di Timbang Presiden Kapadagangan & Pidagangan LNG – Gas & Maritim PETRONAS, Shamsairi Mohd. Ibrahim om SMJ Energy, Datuk Dr. Dionysia Kibat kopihondot ababayan suminain Pibatosan ‘Dasar Induk’ id Malaysian Petroleum Club (MPC), Kuala Lumpur di tadau baino’.
KOTA KINABALU: Koporintaan Pogun Sabah maya’ SMJ Energy Sdn. Bhd. kaanu do 25 pihatus ‘ekuiti’ (nigitan) id kogogonopan gas sandad ‘cecair terapung’ doros tisan rahat (ZLNG) kigatang USD3.1 bilion id Sipitang nosusuhut pinikogosan Pibatosan ‘Dasar Induk’ (Heads of Agreement, HOA) miampai PETRONAS id Malaysian Petroleum Club (MPC) id Kuala Lumpur, di tadau baino’.
“Piilangan nopo diti ponokotanda’ iso’ po naangayan oponsol id kopotontuan sondikoton koburuon timpu anaru Sabah, mongunsub kosunion pomorunan om koumoligan ginoris nogi’ monsupu’ kosiwatan wagu montok posiau komogoton pogun.
“Maya’ kopoopuan kohunung miagal ZLNG, koponginggirot tokou do ginoris kinasangalon ikonomi pogun om papatantu’ koundaran mantad intodonon sandad Sabah kotilombus kouhup miampai mitilombus kumaa kasasanangan rayat,” ka di Boyoon Montiri, Datuk Seri Haji Hajiji Haji Noor katalib suminasi’ ababayan pinisoinan HOA dilo’.
Kogogonopan ZLNG i kikapasiti duo riong tan sontoun (MTPA) diti nopo nga’ pomoruhang oponsol kumaa lanskap LNG pomogunon.
Winonsoi id doros tisan rahat id Sipitang, projik ZLNG do noondo id koponuridongan om pikikiro kotimpuun kotorinaan do piintangaan koduo toun 2027.
Projik diti monginggonop laang LNG Sabah i nokoburu’, suai ko’ duo po kogogonopan LNG mabu-habu ilo’ nopo nga’ PFLNG1 (1.2 MTPA) om PFLNG2 (1.5 MTPA) i noondo diti nokoindalan id kowoigan Sabah.
Koporintaan pogun nga’ pinahabar nogi’ angkab montok koonuan 40 pihatus koponsolon kotonudan id PFLNG1 maya’ SMJ Energy, miampai kopoindalanan ‘due diligence’ pikikiro kotimpuun do pintangaan koduo toun 2025.
Pointonod suminain Pibatosan Piuhupan Komersial (Commercial Collaboration Agreement, CCA) miampai PETRONAS di wulan Kohopod om Duo 2021, trajektori kosunion SMJ Energy nokoburu’ osikap.
Komponi dilo’ do noondo pasanganu 50 pihatus nigitan id aset kopolobusan tumau PSC Samarang, 10 pihatus nigitan id LNG9, 25 pihatus nigitan id kompleks petrokimia SAMUR om kosongonuan poinponu’ kumaa Sabah International Petroleum (SIP) i popoindalan aset FPSO om FSO.
SMJ Energy nga’ mongiggit nogi’ kopotutan nigitan poinpoopori om sumpili’ ‘back-in’ id blok kopongukaban SB409 (20%), SB403 (20%), SB406A (15%) om SB306B (15%).
“Yahai nopo nga’ mangangapu’ kousinan di kitonggungan miampai ponginsomokan disiplin id koponuridongan portfolio. Kogompitan dahai id ZLNG nopo nga’ somboogian di palan kosudong montok monginggumu’ om monginggirot po do nindikohon id siktor ‘huluan’, LNG om petrokimia.
“Kosiwatan diti kopiongoi di mandat dahai montok mongimbulai kouluyungon tunui aadas timpu anaru mantad aset osonong i kapanahak somuli’,” ka di Luguan Upisor Eksekutif SMJ Energy, Datuk Dr. Dionysia Kibat.
Angkab Sabah id siktor ‘hiliran’ nga osonong kinoburuon. Sabah Energy Corporation (SEC), sabaagi ‘pengagregat’ om popoikid gas pogun, kapapanau tonggungan oponsol id kopotontuan pangaba’ gas suang pogun di aadas montok pomorunan Sabah.
Iso’ mantad porjik oponsol SEC kaampai kapangabaan gas mantad loji ‘keluli’ otomou E-Steel kigatang RM31 bilion id Taman Pomorunan Tumau om Gas Sipitang (SOGIP), kopoopuan agayo i monokodung laang Sabah kumaa kopoinggumuan pomorunan.
Nokotindapou nogi’, Montiir Kousinan po nogi’ Ponorikohon SMJ Energy, Datuk Seri Masidi Manjun; Monunurat Koporintaan Pogun, Datuk Seri Sr. Safar Untong; om Luyar Agayo Pogun Sabah, Datuk Brenndon Keith Soh.
