Dr. Joachim (koduo, gibang) miampai di Frankie Phoon (gibang) om Walter (wanan) tuminanud nogi’ ponongkusan kotundunan dilo’ montok kategori veteran.
SANDAKAN: Kopupurimanai di poinponu’ sunduan om pisompuruan nokolikup id koiyonon Sikul Mananga’ Sung Siew do hiti di kosuabon baino’ kopihondot ababayan 118th Anniversary & Fund Raising Onward Sung Siew Run (OSSR) i nokopokito po nogi’ kinopoimpuunan inggisaman agayo kumaa projik kopoundolihan sikul dilo’ kumaa koiyonon id wagu id Batu 4, Jalan Cecily Utara.
Kumoduo Boyoon Montiri II, Datuk Seri Dr. Joachim Gunsalam i pinopoimagon pinomupusan abbayan dilo’, pinopolombus kopongunsikohan kumaa manganganjur mantad kinopongonjuran ababayan kirati dilo’, om minogomi tadau diti sabaagi timpu kisusuyan okon nopo ko’ montok sikul dilo’, nga nogi’ montok oinsanan mogigiyon Sandakan.
Dr. Joachim (kotolu, gibang), Vivian (kotolu, wanan) om tombului di suai minampai id ‘senam robik’ miampai susumikul pogulu minonimpuun pinonongkusan dilo’.
“118 toun okon ko’ timpu di oruhai. Ilo’ kopokito pinapamanahon anaru i noponu’ kaantakan om tinonggungan. Sikul Manangana’ Sung Siew nokopogkosusu rinibuan susumikul i nakalantaoi id mogisuai kaganaan – i potuu id balajaran, kopongindopuan, surupukaraja’ koporintaan, om nogi’ id nayatan sompomogunan,” ka di Dr. Joachim i po nogi’ bagas susumikul sikul dilo’.
Minoboros isio, ababayan ponongkusan kotundunan diti kopokito tonggungan miampai mogigiyon montok papagaras timpu dumontol balajaran tangaanak Sandakan maya’ koposodiaan kogogonopan sikul di lobi doun kaawagu om osimbayan.
Dr. Joachim (tanga’) miampai tombului suai poingunda’ id waya’an kopoungkoyutan montok ponongkusan kotundunan kategori veteran.
“Projik kopoiyanan kawagu diti nopo nga’ iso’ laang kobulun om kipomusarahan osodu’. Otumbayaan oku miampai kogogonopan di lobi kosonong om koiyonon pinsingilaan di lobi kosinggawa’, sikul diti kotilombus kosili institusi abantug om koondosan mogigiyon,” ka wagu di Dr. Joachim i po nogi’ Montiri Koporintaan Koiyonon om Pomuwalaian Sabah.
Ababayan Onward Sung Siew Run dilo’ nokoponimung susumikul, molohing, mongingia’, alumni om nogi’ mogigiyon nokoiyonon i mianganu bohogian id pipiro kategori pinonongkusan, kaampai 1km, 3km om sesi mamanau tomod, sabaagi tanda kosokodungan kumaa inggisaman monimung kousinan.
Dr. Joachim (kaapat, gibang) pinopoimagon kinopoungkoyutan montok ababayan manangkus ‘merentas desa’.
“Toluod tokou baino’ diti okon ko’ rukut nopo tomod, nga kopokitanan kopusohon, kolisihan om tinonggungan sosial di akawas. Tikid laang id ponongkusan diti mogowit dati’ lobi kosomok kumaa imanon agayo – songinan sikul wagu montok sinakagon wagu,” ka di Dr. Joachim.
Pinokianu nogi’ disio mooi do ababayan miagal diti silihon ababayan tikid toun, okon ko’ montok koponimungan kousinan nopo, nga sabaagi inggisaman monompuru mogigiyon, posunui gaya koposion olidas nogi’ pogirot piromutan id pialatan sikul om mogigiyon.
Dr. Joachim (kolimo, wanan) poinsodia’ montok popoindalan kopoungkoyutan montok ponongkusan 3km.
Nokotindapou nogi’ minamaramai ababayan dilo’ nuludan momumuruan sikul, Kotinanan Mongungulud, PIBG, tongo’ mananakadai om sukarelawan i pinapapanau tonggungan oponsol pinapalantoi ababayan kotundunan dilo’.
Nokotindapou nogi’ i Puru Parlimen Sandakan, Vivian Wong Shir Yee; Puru Lintuhun Undangan Pogun (ADUN) Tanjung Papat, Datuk Frankie Phoon Ming Fung; Upisor Balajaran Watas, Datu Roslih Datu Siabok; Presiden Kounsol Kakadayan Sandakan, Walter Kenson; Ponorikohon Kotinanan Mongungulud SM Sung Siew, Ir. Vun Soon Chong; Molohingon PIBG, Dr. Peter Jr. Naintin; Ponorikohon Koisaan Alumni, Johnny Lin Si Thung om Molohingon Sikul, Kwok Chee Yen.
