Dr. Joachim (wanan) ruminuba’ dilo tongo’ luugan parti komponen id GRS i nokotindapou ilo’ nopo nga’ Parti Solidariti Tanah Airku (StarSabah) (koduo, gibang), Parti Cinta Sabah (gibang) om Parti Gagasan Rakyat Sabah (PGRS) Kota Marudu (koduo,wanan).
KOTA MARUDU: Ponowoli Presiden Parti Bersatu Sabah (PBS), Datuk Seri Dr. Joachim gunsalam minokianu oinsanan puur parti mooi do kumaraja’ lobi kagaras om monginggirot piuhupan montok momusus tindikohon ngaawi do PBS, kaampai id watas Tandek.
Minokianu nogi’ isio sokodung ouli’ mantad koombolutan id Gabungan Rakyat Sabah (GRS) montok papatantu’ kalantaion calon PBS id Pomilian Agayo Pogun (PRN) do obontol.
“Orohian oku poposotol do hiti, monguhup tokou tulun sondiri’. Sabaagi ladjong Sabah, i nopo oponsol nga’ papagaras tokou parti nokoiyonon,” ka disio ontok pinopoimagon Mitingan Agayo Toun-toun PBS N.7 Tandek id Lintuhun Poingukab Kakadayan Tandek, do hiti konihab.
Dr. Joachim (kolimo, gibang) minamaramit tandamato mantad di Hendrus om sinasi’ do puru PBS di suai.
Dr. Joachim i po nogi’ Kumoduo Boyoon Montiri II om Montiri Koporintaan Koiyonon om Pomuwalaian minoboros, piuhupan miampai parti ngaawi’ mantad Semenanjung nopo nga’ oponsol, nga’ posuulon nuru’ patahakon kumaa kaadangon om kopomuruanan pulitik id nayatan pogun lobi kopogulu om piuhupan dilo’ haro soira’ do parti lokal (GRS) i mogowit pulitik pogun diti.
“Sabah nopo nga’ tana’ kinosusuon toou. Lobi tokou do karati om kaanu manalasai kobolingkahangan miampai lobi poinpuli om poliliput id pogun diti,” ka disio pinoposotol.
Dr. Joachim (kotolu, gibang) guminambar pongingitanan katalib pinopoindalan gimik kinopohimogonan kinopoimpuunan tinimungan komulakan PBS Bohogian Tandek montok toun 2025.
Pinoposorou nogi’ isio oinsanan puur PBS do yolo’ no o toruntud do parti om minokianu di oinsanan pakakaraja’ tumungag popoburu’ sondikoton PBS id pototogkop Sabah.
“Nuru’ tokou kumaraja’ agaras montok no do parti om sopisokodung tiso’ om tiso’ montok mamagampot kalantaion,” ka disio.
Dr. Joachim (poindikau, ponong gibang) guminambar pongingitanan miampai di Hendrus om oinsanan puru pBS om mongongobi’ mantaad parti komponen GRS (mio’ontong) i nokotindapou id Mitingan Agayo Toun-toun PBS Bohogian Tandek di ko-40 dilo’.
Id boboroson disio, minongunsikou nogi’ isio kumaa di Luguan Bohogian PBS Tandek i po nogi’ ADUN Tandek, Datuk Hendrus Anding mantad kinapagalapan popoimagon mitingan dilo’.
Nokotindapou nogi’ i tongo’ Puru Kounsol Takawas (AMT), Luguan Tinimungan Komulakan, Datuk Christoper Mandut miampai Exco Komulakan, Exco Koonduan, tongo’ mongongobi’ parti komponen id GRS, tongo’ luguan bohogian om nogi’ Ponorikohon Pointatap Mitingan, Fredolin Totin Bangon.
