Hajiji pinopoidu’ molohing ‘kerang darah’ id jeti Borneo Beach and Mangrove Resort id Tuaran di baino’.
TUARAN: Koporintaan pgoun pinopoimpuun Projik Kopoburuan Intodonon om Pomorunan Kerang Sabah i kikosiwatan manahak nindopuan gisom RM34.4 riong sontoun, tumanud pongintoban kinopotindalan soginumu’ 3,240 metrik tan sontoun om asil kopoopuan soginumu’ do 7.6.
Boyoon Montiri, Datuk Seri Haji Hajiji Haji Noor minoboros, projik diti kopongukab kosiwatan wagu montok kerang id Sabah maya’ ababayan posusuhut miagal do kopotiinan, kapamansaian sambal kerang om produk taakanon mantad ‘kerang darah’.
“Montok boogian swasta, iti no timpu bobos osonong montok papaapu’ id kapamansaian takanon rahat, kopomolopotan ‘lestari’ om koburuon piromutan pangaba’ poudaron Sabah.
“Kosiwatan diti okon nopo ko’ kopountung, nga koponuridong timpu dumontol di ogirot,” ka disio ontok pinopoimagon kinopoimpuunan projik dilo’ id Borneo Beach and Mangrove Resort do hiti, di tadau baino’.
Hajiji nonuan kopointalangan karait tiknologi pomogompian kerang ‘tepat’ di Luguan Unit Moluska Institut Ponolidikan Ponginsadaan, Dr. Hadzley Harith.
Boyoon Montiri minoboros, Projik Koburuon Intodonon om Pomorunan Kerang Sabah diti kopiongoi di tonggungan koporintaan pogun montok papatantu’ Ikonomi Obulou kosili impohon ikonomi ogirot montok rayat Sabah.
Ka disio, koporintaan pogun pointopot popoindalan laang ngaawi’ kopongukaban intodonon marin om maritim sbaaagi inggisaman monginggirot nindikohon pogun id landskap Ikonomi Obulou sompomogunan.
“Ikonomi Obulou okon nopo ko’ kikosiwatan popiadas di komogoton om kotilombuson, nga’ dumontol toun 2030, gatang global Ikonomi Obulou pikikiro kosigampot USD3 trilion,” ka disio.
Projik Koburuon Intodonon om Pomorunan Kerang Sabah i mana poindalano’ id duo fasa diti nopo nga’ mantad piniuhupan do Bohogian Kikuasa’ Koburuon Ikonomi om Kopoopuan Sabah (SEDIA), Koupisan Ponginsadaan Malaysia om Koupisan Ponginsadaan Sabah.
Fasa kumoiso’ di nopongo kopohompit pinonolidikan ‘pemetaan’ om pinongukaban intodonon kerang darah Tegilliarca granosa i pinoindalan mimpuun wulan Kohopod 2-024 gisom Kolimo 2025 id onom kinoiyonon kikosiwatan kaampai Tuaran om Beluran, i monimpuun projik kopogulu.
Fasa koduo projik pinoulud kotimpuun do toun 2026, kopohompit kopoundolihan tiknologi om kopoindalanan id nokoiyonon.
Luguan Unit Moluska Institut Ponolidikan Ponginsadaan Dr. Hadzley Harith (gibang) minanahak kopointalangan kumaa di Boyoon Montiri pogulu kinopoiduan molohing kerang id Bonreo Beach and Mangrove Resort id Tuaran di tadau baino’.
Ka id Hajiji, soginumu’ 77 lot akuakultur di nointutunan, kapaampai do 12 id Tuaran om 65 id Beluran kopohompit koiyonon kiginayo 1,617 hektar.
Tikid lot poindalanon do 10 luguan suang walai (KIR), koposili ginumu’ koinsanai 770 KIR sabaagi mamaramit koundaran kopio kapaampai mantad mongungusaha’ ponginsadaan, mogigiyon labus kakadayan om tinimungan B40.
“Om nogi nung 40 pihatus no mantad lot diti koindalan id kapasiti di poinbobos, tutumanud kaanu nindopuan kikiro RM4,800 gisom RM6,500 sombulan,” ka disio.
“Tantu’ no, mogigiyon di kohompit karamit nindopuan po’ompus maya’ pomogompian kerang darah. Tinimungan komulakan nga’ potoriningon miampai komilaan akuakultur doun kaawagu, mongimbulai sinakagon wagu mongingindapu’ marin Sabah.
“Otopot nopo kopio, projik diti okon ko’ koowit no do kosimbanon agayo kumaa rayat, kosuul no mogigiyon di poinhompit nga nogi’ kumaa sandad posorili’ om ikonomi pogun.
“Sabah poburuon sabaagi Hab Takanon Rahat Obulou ASEAN i kotopong di pogun ngaawi’ papalabus agayo miagal Perak, Pulau Pinang om Selangor,” ka disio.
Boyoon Montiri minoboros, koporintaan pogun pointopot monokodung pomorunan diti om mokianu tutumanud projik onuan pingludaan di po’ompus nogi’ tiknologi doun kaawagu.
“Pokionuon ku mogigiyon id Tuaran om Beluran sabaagi moninimpuun toi monogulu projik diti do momoguno poinponu’ tiknologi doun kaawagu di aanu montok mongingkawas kapasiti om asil nimbulayan siktor akuakultur,” ka disio.
