Mansur (kotolu, gibang) guminambar pongingitanan miampai di Cyril (kaapat, wanan), Ruskap (kotolu, wanan) om tinonudan RTM Sabah.
KOTA KINABALU: Koupisan Koposolimbahan Malaysia (RTM) Sabah magalap sukod wagu id pogun diti kosuul no i orohian do pomorunan seni tuunion montok rumapou id ababayan Gaa’ Sinding SABAHVfm 2025 do jam ko 8.30 totuong id Lintuhun Hongkod Koisaan, KDCA, Penampang do ko 10tw Koturu’ diti.
Kohondot dilo’, RTM Sabah pinopiromut piuhupan miampai Komontirian Komulakan om Spoot (KBS) Sabah montok magalap puru koisaan om tinan komulakan kaampai Kounsol Komulakan Sabah (MBS).
Tinonudan RTM Sabah binuruan di Kumoduo Potunud Kosolimbahan Sabah, Ts. Cyril Simon pinapaharo kotombuluyan apantang kumaa di Monunurat Pointatap KBS Sabah, Datuk Mansur Asun id upis disio doid Wisma MUIS, Kota Kinabalu.
Nokotindapou nogi’ i Kumoduo Monunurat Pointatap Bohogian Komulakan KBS Sabah, Mary Paul, Monijor SABAHVfm Ruskap Muaram, Monguhup Monijor SABAHVfm Wasni Parimbos om Mongungulud SABAHVfm (Inggilis) Farah Lee Asman.
Gaa’ Sinding SABAHVfm kituduan papabantug sinding-sinding tinaru Sabah om mongunsub kapamansaian karya seni wagu.
Ababayan insan duo toun dilo’, di kumoinsan pinaharo di toun 2023, nopo nga’ ababayan agayo kosolimbahan radio RTM Sabah id siriba’ stisin radio SABAHVfm.
Ilo’ nopo nga’ kapaamung sinding-sinding mantad apat tinaru asapou id Sabah ilo’ nopo nga’ Kadazan, Bajau, Murut om Dusun.
