Dr, Joachim (tanga’) guminambar pongingitanan miampai komulakan Kampung Gusi montok ababayan pinialaan mutusikol ‘lasak’ (Motor Cross) pinaanjur Komulakan Parti Bersatu Sabah (PBS) Kundasang i binuruan di Khairol Majide Kalimin.
RANAU: Mogigiyon kampung unsubon momoguno poinggonop kogogonopan lintuhun mini i pinosodia’ koporintaan montok popoindalan mogisusuai kaparagatsan mogigiyon, sipoot om koponuangan timpu osinggawa’.
Kumoduo Boyoon Montiri po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam minoboros, ponuridongan lintuhun mini miagal id Kampung Gusi, Ulu Sugut nopo nga’ wookon inggisaman oponsol koporintaan pogun montok popironit pisuayan koburuon pialatan koiyonon kakadayan om labus kakadayan.
Dr. Joachim (poindikau kaapat, gibang) guminambar pongingitanan miampai di Yubidi (poindikau kaapat, wanan), Dounis (koduo wanan) nogi’ oinsanan mogigiyon kampung i nokotindapou id ramai kinopoimaganan lintuhun mini wagu di tadau Koiso’.
“Nung monuridong tokou do iso’ linimput nga’ amu’ gunoon poinponu’, ilo’ kirati do momirubat kousinan koporintaan, i potuu mantad koporintaan pogun toi koporintaan Pisompuruan.
“Kalansananku lintuhun mini diti gunoon poinggonop do mogigiyon nokoiyonon montok papaanjur mogisusuai ababayan kaampai kaparagatan komulakan. Pinoilo oku, iso’ pialaan badminton nakaharo lobi kosopung pogulu nakapanau ramai kinopoimaganan lintuhun diti,” ka disio ontok pinopoimagon lintuhun mini kampung dilo’ di tadau Koiso’ (23tw Koonom).
Dr. Joachim minanahak ‘first aid’ miampai minongimuai longon songulun komulakan i tuminanud pinialaan mutusikol lasak dilo’.
Kampung Gusi, Ulu Sugut nopo songinan pongingiyonon poingusuk id watas DUN Kundasang i poinsumpak doros piwolitan watas Beluran.
Nokopogulu id ababayan sopisuai, Dr. Joachim ruminuba’ nogi’ di sukod wagu kampung dilo’ miampai pinopoimagon kinopoungkoyutan pialaan mutusikol ‘lasak’ (Motor Cross) id kampung dilo’ i pinaanjur do Komulakan Parti Bersatu Sabah (PBS) Kundasang, binuruan di Khairol Majide Kalimin.
Nokotindapou nogi’ i Monunurat Pulitik disio, Yubidi Gumpoyo; Lansanon Koburuon Mogigiyon (PPM) DUN Kundasang, Dounis Sani; Molohingon Kampung om Ponorikohon Puruankuasa’ Koburuon om Koumoligan Kampung (JKKK).
