Dr. Joachim (kaapat, gibang) guminambar pongingitanan miampai oinsanan i nokotindapou id ramai dilo’.
RANAU: Kumoduo Boyoon Montiri i po nogi’ Puru Lintuhun Undangan Pogun (ADUN) Kundasang, Datuk Seri Dr. Joachim Gunsalam pinoposiwat timpu miampai mogigiyon mantad Mukim Karagasan i kapaampai turu’ kampung doid iso’ ramai mogigiyon id Lintuhun Mini Kampung Karagasan, do hiti di konihab (24tw Koonom).
Pinopoimagon isio Ramai Kaamatan 3.0, Tadau Mongingia’ om Tadau Paganakan pinaanjur Koisaan Molohing om Mongingia’ (PIBG) Sikul Kabansaan (SK) Karagasan.
Dr. Joachim (kotolu, gibang) pinoindalan kopoimaganan ramai dilo’ om sinasi’ di Jaminus (koduo, gibang) nogi’ ilo suai.
Dr. Joachim pinopolombus kopongunsikohan kumaa di Molohingon PIBG, Eddy Batis nogi’ boogian sikul mantad piniuhupan om tonggungan pinapaanjur ababayan dilo’ i komoyon do iso’ kosiwatan oponsol popigirot piromutan nayatan mogigiyon, sikul om kopomuruanan nokoiyonon.
“Kaparagatan miagal diti osonong kopio tu’ kosili ilo’ timpu montok dati’ mogititimung. Kosuul no pamaramaian Ramai Kaamatan 3.0 diti, kapanahak ilo’ kosiwatan kumaa dati’ popokito kinolumison tinaru Tinagas id Ranau,” ka disio.
Ka disio kawagu, kopongonjuran ababayan miagal diti nga’ koponompuru nogi’ do mogigiyon nokoiyonon toi id boros Dusun, “misompuru’.
Id boboroson disio, minanahak nogi’ i Dr. Joachim kopongunsikohan kuminaa tongo’ mongingia’ i nokotindapou om kitongungan agayo id koponudukan sukod wagu.
“Nung aiso’ mongingia’, okon tokou doti’ ko’ id niyonon tokou do noondo diti,” ka disio i minamason nogi’ do susumikul i nokotindapou do mamantang om mokinongou boros tongo’ mongingia’.
Dr. Joachim (kotolu, gibang) minamaramit tandamato mantad di Sabirin om sinasi’ di Jaminus (gibang) om ilo suai.
Dr. Joachim minamarayou inggisaman di Molohingon Agayo SK Karagasan, Sabirin Asiri i nakalantoi pinopogura’ kawagu PIBG om minokianu tongo’ molohing tumilombus monokodung nogi’ miuhup miampai boogian sikul.
“Mantad haro pisokodungan ogirot id pialatan molohing om boogian sikul, otumbayaan oku SK Karagasan kaanu sumikul sikul abantug do timpu obontol,” ka disio kawagu.
Nokotindapou nogi’ id ramai dilo’ i Monguhup Upisor Balajaran Watas Ranau, Jaminus Agang; tongo’ lansanon mogigiyon nokoiyonon kaampai tongo’ molohingon kampung, ponorikohon JKKK, Mobi’ Luguan Mamasok Pogun (WKAN), om Luguan Mamasok Pogun (KAN).
