Dr. Joachim (poindikau) miampai tombului i nokotindapou minintong skrin kopokitanan kosolimbahan mitilombus premis ngaawi’ pongindopuan Kakadayan Donggongon id pisuk ‘Command Centre’ Kounsol Kakadayan Penampang.
PENAMPANG: Id inggisaman monginggirot nubasanan ogirot om inovasi id surupukaraja’ koporintaan, Kounsol Kakadayan Penampang (MPP) nokoposurat iso’ kinalantaion soira’ Longkod Upis dau miampai poinggirot nakaramit Setifikit Kopongokunan Green Building, nokoposili dilo’ do linimput koporintaan kumoiso’ id Sabah nakaramit kopongokunan dilo’.
Kinopongokunan dilo’ pinahabar id iso’ ramai pinotomod i pinoimagon di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam, i pinopohimagon po nogi’ do ‘Aplikasi e-Adu’ nogi’ ‘Command Centre MPP’ id iso’ ababayan piniamung di kosuabon baino’.
Dr. Joachim suminain plas kinopoimaganan pisuk ‘Command Centre’ MPP.
Dr. Joachim minoboros, naangayan nopo diti kointalangan atalang tonggungan MPP id kinoponimbaran kaantaban global kopohompit kosimbanon tongus (iklim), koponguludan ginoris nogi’ kopongingkurian kopoiduan karbon.
“Iti nopo iso’ naangayan di kopoondos. Kopongokunan Green Building diti kopokito tonggungan MPP montok mongulud linimput miampai poinggirot, maya’ laang ngaawi’ miagal kapadakatan sistem solar, pomogunaan kakamot opulokis ginoris nogi’ pomogunaan sumbu LED,” ka disio id boboroson kinopohimaganan id donimbas MPP, di tadau baino’.
Dr. Joachim minoboros do kinalantaion nopo diti kopiongoi di sondikoton koporintaan pogun montok poposili Sabah sabaagi pogun ‘pintar’, ogirot om monimbar di haal ngaawi’ sandad posorili’ om kasasanangan rayat.
Kinopongokunan Green Building patahakon kumaa linimput i kopomogonop kosudongan (piawaian) kogiroton, kaampai kopulokison ginoris, ponguludan waig, pomogunaan kogogonopan pomonsoi osuau sandad posorili’ nogi’ koyuyuon pomowonsoi i monokodung pomogunaan kawagu (kitar semula) om kopomutongusan poinsandad.
Kinalantaion MPP diti nga’ kohunung nogi’ di ‘Teras Kotolu’ id Palan Koburuon Sabah Maju Jaya (SMJ), i moningkanan kumaa Kasasanangan Rayat om Kogiroton Sandad Posorili’, kaampai no koburuon ouli’ om tiknologi otomou sabaagi wookon tingkananon kopio.
Dr. Joachim minamarayou kobulunon MPP id kopongumbalan tiknologi wagu i okon nopo ko’ kopogkikit kos kopoindalanan timpu anaru, nga nogi’ koowit kumaa inggisaman global monoibau kosimbanon tongus.
Dr. Joachim (kaapat, gibang) suminasi’ di Ir. Ashwin pinapatahak setifikit Kopongokunan GreenRe kuminaa di Noemi.
Suai dilo’, kinopoimpuunan Aplikasi e-Adu om Command Centre MPP nga’ ponokotanda’ nogi’ kosimbanon timpu wagu id kopoindalanan pomogunaan digital om koponguludan mimpau kointlaangan id nayatan koporintaan koiyonon.
Command Centre diti oinggonopan do sistem kapanamangan CCTV i okon nopo ko’ gunoon montok koumoligan om kopogintongan trafik, nga monguhup id koponguludan kadaaton miagal liyud om kaantakan amu’ opikikiraan.
Aplikasi e-Adu nopo kapasaga’ rayat papatahak ruputan miampai lobi kasanang, otulid om osikap, kopiongoi di angkab monuridong kakadayang di ‘responsif’ om mongingkanan rayat.
“Ponginsomokan wagu diti kopokito poingkuro MPP gumura’ kumaa songinan kakadayan pintar toi ‘Smart City’, i mimpau do tiknologi om kointalangan montok mongingkawas kopulokison nogi’ sinonong koposion rayat,” ka disio pinopointalang.
Dr. Joachim minongunsikou nogi’ kumaa oinsanan bohogian i pinapalantoi projik diti, kosuul no bagas Presiden MPP, Francis Chong, nogi’ Benny Ng om SHAREDA i ogumu’ kinouhupan id komilaan teknikal om kabaalon.
Pokionuon disio mooi kinalantaion diti silihon sabaagi pangadang rontob kumaa bohogian kikuasa’ nokoiyonon (PBT) suai id Sabah, mooi tumilombus ki’inovasi om poposuul kogiroton id pamalanan nogi’ kopoindalanan koburuon.
Nokotindapou nogi’ Puru Lintuhun Undangan Pogun (ADUN) Kapayan i po nogi’ Ponorikohon Koperasi Koburuon Desa (KPD), Jannie Lasimbang; Monunurat Pointatap Komontirian, Datuk Dr. Jamili Nais; Kumoduo Presiden MPP, Noemi Dyena Johntren; Luguan Monguhup Potunud Bohogian Koporintaan Digital Sabah, Disney Lai; Monunurat Pulitik kumaa Puru Parlimen Penampang (minongobi’ di Puru Parlimen Penampang), Carl Masoom; Presiden SHAREDA, Datuk Johnny Wong; Potunud Eksekutif GreenRE Sdn. Bhd, Ir. Ashwin Thurairaja om Luguan Koupisan Kopoindalanan Perbadanan Pinjaman Sabah (SCC), Salina Salimi.
