Hajiji kuminakap nohompitan kinotutudan Kampung Petagas om Bukit Vor id Lintuhun Sri Putatan di tadau baino’.
PUTATAN: Koporintaan pogun pinapatahak ponguhupan kolimpuunon kuminaa nogompitan kinotutudan id Kampung Petagas om Bukit Vor i naantakan di ko 16 om ko 17tw Koonom katatalib, nokopohompit 74 nogompitan mantad 28 paganakan.
Boyoon Montiri, Datuk Seri Haji Hajiji Haji Noor minindahu’ minooi kakap om pinapatahak ponguhupan dilo’ kuminaa luguan suang walai (KIR) nogompitan di naantakan, i noondo diti pinoiyon id Longkod Poundolihan Naamot (PPS) id Lintuhun Sri Putatan, di tadau baino’.
Hajiji pinapatahak Ponguhupan Tusin Ihsan om balatak takanon kuminaa luguan suang walai nohompitan kinotutudan Kampung Petagas om Bukit Vor id Lintuhun Sri Putatan di tadau baino’.
Ka disio, montok popoinggaan tonggungan di nogompitan, tikid KIR minamaramit mogisusuai koyuon pinonguhupan kaampai ponguhupan Tusin Ihsan (BWI) soginumu’ RM1,000, ponguhupan Yayasan Kotundunan Sabah (KYS) soginumu’ RM1,000, ponguhupan Longkod Zakat Sabah, Kounsol Ugama’ Islam Sabah (MUIS) kiginumu’ RM1,000 om balatak takanon nogi’ RM300 mantad Perbadanan Baitulmal Pogun Sabah.
“Montok KIR i walai diolo’ nou’u, koporintaan pogun monuridong Walai Mesra SMJ id kinoiyonon di haro mantad, naamot montok walai i somboogian no notutudan, koporintaan monguhup id pialatan RM5,000 gisom RM10,000,” ka disio.
Minoboros isio, koporintaan pogun opoduli’ kopio om papatantu’ kotundunan rayat toririmo pointamong, lolobi soira’ kotoguang kadaaton.
Hajii suminasi’ simbolik kinapatahakan toluod mantad Longkod Zakat Sabah, Kounsol Ugama’ Islam Sabah (MUIS) om Perbadanan Baitulmal Pogun Sabah kuminaa di Masawi.
Id duo kinaantakan sopisuai dilo’, 74 tulun nogompitan mantad 29 paganakan natagakan iyon-iyonon.
Kinotutudan id Kampung Petagas nokopohompit 21 KIR miampai 46 nohompitan, naamot kinotutudan id Bukit Vor nokopohompit 8 KIR miampai 28 nohompitan.
Nokotindapou nogi’ id ababayan dilo’ i Kumoduo Boyoon Montiri III po nogi’ Montiri Karaja Agayo, Datuk Ir. Shahelmey Yahya; Montiri Sains, Tiknologi om Inovasi Pogun, Datuk Dr. Haji Mohd. Arifin Datuk Mohd. Arif; Monunurat Koporintaan Pogun, Datuk Seri Sr. Haji Safar Untong; Puru Lintuhun Undangan Pogun (ADUN) Petagas, Datuk Awang Ahmad Sah Datuk Awang Sahari; Monunurat Haal Suang Pogun om Ponolidikan, Datuk Awang Shahminan Datuk Haji Sahari om Upisor Watas Putatan, Masawi Haji Salleh.
