Hajah Juliah Salag
KOTA KINABALU: Kinoposoliwanan kumoinsan Majalah ‘Idola Wanita Sabah’ i kopokito ‘idola’ om ‘ikon’ koonduan kounsub Sabah kalansanan kosili ombitanan kumaa koonduan id pogun diti do tumilombus katama’ lumaang id toguang.
Sawo Boyoon Montiri i po nogi’ Molohingon Agayo Kotinanan Muafakat Titipan Amal Sawo Mobi’ Rayat, Gabungan Rakyat Sabah (MUTIARA-GRS), Datin Seri Hajah Juliah Salag minoboros, iti nopo nga’ iso’ majalah i kikointalangan kopio om kapanahak intodonon pomusarahan kumaa koonduan id pogun diti.
Bayahan kumaa Kotinanan Bakatnita Sabah tu’ mininggisom pinapalantoi koposoliwanan Majalah Idola Watina Sabah 2025 Edisi 1 i pikikiro kalabus do wulan Koonom diti.
“Orohian oku nogi’ manangkabayahan kumaa mamaramit Gaa’ Tokoh om Ikon ‘Wanita Inspirasi Sabah’ do sodop diti. Koonduan okon nopo ko’ kitonggungan id ponuridongan paganakan di oulud, nga nogi’ id kosimbanon sosial, ikonomi om koubasanan.
“Mantad haro gaa’ diti, do kapanahak tokou pongokunan kumaa tongo’ koonduan i minanahak turianan, pomusarahan kumaa tulun suai do tumilombus minggisom om kalantoi, nogi’ papagaras po do nindikohon diolo’ id mogisuai kaganaan,” ka disio ontok pinopoimagon Ramai Gaa’ Ikon Wanita Inspirasi Sabah 2025, do hiti di konihab. Teks boboroson disio binasa’ di Timbang Molohingon Agayo I MUTIARA-GRS, Datin Seri Cecilia Edwin Kitingan.
Daamot dilo’, mokianu i Juliah lobi kogumu’ inggisaman montok papatantu’ koonduan kaanu koromuton di miagal id oinsanan sunduk koposion.
Ka disio, katatapan i osuau koonduan okon nopo ko’ nuru’ intangan id sunduk pakarajaan, nga nogi’ id kaganaan balajaran, panamangan kolidasan, kasasanangan sosial om kopongindopuan.
“Koonduan kiguno onuan lobi kogumu’ kosiwatan montok popolombus pomusarahan diolo’ id kapamalanan katatapan i kapanahak koundaran kumaa koinsanai koonduan id pomogunon diti.
“Kohohdot dilo’, kalansanan ku mogisusuai inggisaman i poindalanon do tongo’ kotinanan koporintaan pogun miagal ababayan pintoriningan komilaan om kosiwatan pongindopuan i poindalanon do wookon dilo’ do Koupisan Haal Koonduan Sabah (JHEWA) nuru’ ponongkisolodan di koonduan id pogun diti.
“Ababayan pintoriningan komilaan kouhup do koonduna maganu toilaan om komilaan wagu nogi’ koposili tinimungan diti lobi kopimpoopori om kiginoris tumopong id pakarajaan om nogi’ pongindopuan,” ka disio.
