Dr. Joachim (kaapat, gibang) pinapatahak ‘Notis Anti Gangguan Seksual’ kumaa Potunud Institut Pintoriningan Komontirian Kolidasan Malaysia (KKM) Tawau, Dr. Kogilavani A/P Subermaniam.
TAWAU: Kumoduo Boyoon Montiri II, Datuk Seri Dr. Joachim Gunsalam pinopolombus kotongongan kohondot kinoingkawason kes kopoimamangan seksual id pototongkop pomogunon, om minongunsub laang mogiuhup oinsanan bohogian do monoibau kobolingkahangan dilo’ do pointootopot.
Minoboros isio, tumanud ruputan Pulis Diraja Malaysia (PDRM), soginumu’ 477 kes kopoimamangan sesksual nokosurat di toun 2022, nokoingkawas kuminaa 522 kes di toun 2023 om nokosimbuat kuminaa 788 kes po’ompus toun 2024.
“Gisom tulan Kotolu 2025 nopo, haro no 214 kes i nokoruput om mantad ginumu’ dilo’, limo kes naantakan id Sabah,” ka diiso ontok pinopoimagon Ramai Pinomupusna Ababayan Kembara Kasih Komontirian Koburuon Koonduan, Paganakan om Mogigiyon (KPWKM) 2025 id Lintuhun Poinsompon Kompleks Sipoot Tawau di songkosodop.
Dr. Joachim minoboros, ginumu’ kinoingkawason dilo’ kopokito songkuro winagat kobolingkahangan kopoimamangan seksual om kogunoon kopio do mongingkawas rontob kopurimanan mogigiyon, suai ko’ monginggirot kapatahakan sokodung kumaa nogompitan.
“Kopoimamangan seksual nopo nga’ koulalaho’ di araat i aanu aantakan kumaa disasai nopo amu’ momuntuk koulunan, tinuo, tinaru toi ugama. Nuru’ ilo’ do antaban mantad nayatan osopung tu’ nung pologoson, koowit ilo’ kumaa kopomusalaan lobi kawagat miagal ‘manambarana’ om kopongumangan do koonduan,” ka disio.
Dr. Joachim (kaapat, gibang) miampai tombului apantang i nokotindapou pinopoindalan gimik kinopoimaganan ramai dilo’.
Kohondot dilo’, minamaramit poinsonong isio inggisaman KPWKM i pinopointutun Tribunal montok ‘Antigangguan Seksual’ (TAGS) sabaagi pawaya’an sumpili’ do kuut sivil montok papasanang kopoindalanan ruputan miampai osikap, asanang om gatang osiriba’.
Ababayan sodop diti nokopokito nogi’ kinapatahakan ‘Notis Anti Gangguan Seksual’ kumaa koupisan om kotinanan poinhompit sabaagi ponokotanda’ tonggungan koporintaan id inggisaman manalob kopomusalaan dilo’.
Daamot dilo’, Dr. Joachim minongunsub nogi’ lobi kogumu’ nogompitan do tumigulai momonsoi ruputan om monugat kaadangon.
“Kopongumangan do koonduan okon ko’ haal okoro’. Ogumu’ nogompitan i kakal orosian do mungkomi mantad no do ‘stigma’, kahagakon sosial toi amu’ koilo pawaya’an montok mokianu ponguhupan. Yati’ oinsanan kitonggungan mongimbulai koyuon posorili’ di oumolig om monokodung di nokogompitan do mungkakat mongobi’ tinan,” ka disio pinoposotol.
Dr. Joachim ontok minanahak boboroson id ramai dilo’.
Nokopogulu, minamarayou isio kinalantaion Ababayan Kembara Kasih KPWKM 2025 i nokohombo onom watas id Sabah kaampai Tuaran, Papar, Penampang, Lahad Datu, Kunak om nopupusan id Tawau di konihab.
Soginumu’ 34 ababayan kopohompit mogisuai kotinanan id siriba’ KPWKM pinoindalan po’ompus kembara dilo’ i moningkanan tinimungan kopotonggoi ngaawi miagal koonduan, tanak-anak, tulun nolohing om Tulun Amu’ Songkuro Kohimboguian (OKU).
Ababayan miagal Ziarah Kasih i papatahak ponguhupan miampai mitilombus kumaa ‘klien’ Koupisan Kotundunan Mogigiyon (JKM) om Kotinanan Mogigiyon om Koburuon Paganakan Negara (LPPKN) nga’ nakaanu raramit osonong mogigison nokoiyonon.
Nokotindapou nogi’ id ramai dilo’ i Kumoduo Luguan Monunurat (Operasi) KPWKM, Farah Adura Hamidi minongobi’ Montiri KPWKM; Monguhup Montiri kumaa Boyoon Montiri om Puru Lintuhun Undangan Pogun (ADUN) Apas, Datuk Haji Abu Bakar Titingan; Puru Parlimen Tawau, Datuk Lo Su Fui; Ponorikohon Kotinanan Koburuon Kotolunan Pogun om ADUN Balung, Datuk Hamild Awang; Monunurat Pulitik kumaa Montiri Kousinan om ADUN Kukusan, Datuk Rina Haji Jainal; Luguan Potunud Koupisan Koburuon Koonduan, Hanani Sapit nogi’ tongo’ upisor totuo komontirian om koupisan poinggompit.
Dr. Joachim i tinanud di sawo dau, Datin Seri Linda Ewit nga’ pinapatahak nogi’ pongunsikohan kumaa bohogian manganganjur tu’ minomili’ Sabah sabaagi rinikoton Kembara Kasih do toun diti.
