Haji Hajiji Haji Noor
KOTA KINABALU: Boyoon Montiri, Datuk Seri Haji Hajiji Haji Noor minokianu tinimungan komulakan id pogun diti do mongukab pomusarahan om mintong Balajaran om Pingludaan Teknikal om Vokasional (TVET) sabaagi sumpilion osuul monuridong timpu dumontol lobi kanawau, okon ko’ montok nopo indalanon ‘altenatif’ (sumpilion).
Ka disio, kaganaan TVET do noondo kapapanau tonggungan agayo id koburuon ikonomi om sosial pogun, kopiongoi di kinosimbanon tiknologi nogi’ kogugunaan pomorunan timpu diti.
“TVET okon nopo ko’ momogonop sosongulun do komilaan ‘praktikal’, nga nogi’ kopiongoi di kapagarasan, kosiwatan pakarajaan om kosunion ikonomi,” ka disio id Ramai Kinopoimpuunan Kounsol TVET Sabah (MTS) id Magellan Sutera Harbour, do hiti di tadau baino’. Teks boboroson disio binasa’ di Kumoduo Boyoon Montiri III po nogi’ Montiri Karaja Agayo Pogun, Datuk Ir. Shahelmey Yahya.
Hajiji pinoposotol do kurusus ngaawi’ TVET di pouyuhon noondo diti pinisudong di kogunaan pidagangan karaja’ om siktor pomorunan di nokoburu’ kopio, nokoposili dilo’ do iso’ ralan karaja’ di aadang om kiginoris koburu’ montok sukod wagu.
“Unsubon ku komulakan pogun diti do amu’ bakangon do umampai kaganaan TVET. Iti no timpu montok monimban pomusarahna om mintong do TVET sabaagi pilion di kohyunung om mongukab kosiwatan montok sumili abaal, mongindapu’ om ‘inovator’,” ka disio.
Ka disio, MTS i pinoimpuun di tadau baino’ diti nopo nga’ tonggungan koporintaan pogun do monginggirot ekosistem pingludaan teknikal, mongulud lobi 160 kotinanan TVET id pototongkop pgoun om papatantu’ tikid graduan di koimbulai ototopot poingunda’ monoguang kaantaban pomogunan pakarajaan.
Minoboros isio, TVET nga’ komoyon nogi’ do poposikap agayo kumaa sondikoton koburuon pogun maya’ Palan Sondikoton Sabah Maju Jaya (SMJ) 2.0 om dokumen ‘strategik’ nasional miagal Sondikoton Koburuon Ogirot (SDG 2030), Palan Induk Pomorunan Wagu (NIMP 2030) om National Energy Transition Roadmap (NETR).
Hajiji minamarait nogi’ haal kosimbanon tiknologi timpu diti, kaampai komilaan winonsoi (AI), i monugat do sukod wagu sumodia’ di komilaan wagu i kikoyuon ‘adaptif’ om poingimpau do ‘inovasi’.
“Pomogunan pakarajaan masaan sumimban. Nung komulakan Sabah amu’ kosodia’ do komilaan di kosudong, oiduanan tokou. TVET nopo nga’ impohon bobos osonong montok dati’ poburu’ ‘modal insan’ kikomilaan akawas di koposiau komogoton pogun,” ka disio pinoposotol.
Ka disio, kinopoimpuunan Kounsol TVET Sabah koponokotanda’ iso’ timpu wagu id kapagarasan koburuon komulakan maya’ pingludaan oulud om tumanud kogunaan pomorunan – potilombus dino koposili Sabah sabaagi hab ginoris karaja’ kikomilaan i koponokitopong id nayatan nasional om ponongkoiyonon.
Ka di Hajiji, kounsol diti okon ko’ nuludan kopoindalanan nopo, nga’ impohon kosudong montok monompuru kotinanan koporintaan, kotinanan pingludaan, siktor pomorunan om papamanau agayo TVET id iso’ ekosistem oulud om kopotonggoi ngaawi.
Tumanud disio, Kounsol TVET Sabah nga kitonggungan nogi’ sabaagi mongungulud katatapan, poposiau sondikoton pingludaan komilaan om sabaagi popiromut kohunung kumaa upalai dana kopoburuon mantad koporintaan Pisompuruan.
“Ilo’ koponokodung nogi’ ababayan kapagarasan komulakan om kolokuon graduan, suai ko’ monginggirot kopongokunan nogi’ kapanahakan setifikit komilaan id nayatan pogun,” ka disio pinoposotol.
