Hajiji guminambar miampai wookon i nokotindapou kopihondot Ababayan Santai YAB Boyoon Montiri Miampai Maangampawong Sabah 2025.
KOTA KINABALU: Boyoon Montiri (KM), Datuk Seri Haji Hajiji Haji Noor minaganu kosiwatan monongkirumo om minokinongou pokionuon nogi’ kogugunoon ‘pempenganguh’ toi ‘influencer’ (maangampawong) id pogun diti kopihondot ababayan Santai YAB Boyoon Montiri Miampai Maangampawong Sabah 2025 id North Borneo Cruise, Kota Kinabalu, di konihab.
Kopihondot ababayan dilo’, pipiro maangampawong kikosiwatan pinapatahak pomusarahan om angkab tinimungan dilo’ montok poposimbuat tonggungan diolo’ miampai lobi kiwaya’ id pogun diti.
Wookon di nulingad nopo atag ponuridongan ‘entiti’ (tinan) i kitonggungan manamong om mongulud koguraon karaja’ id nayatan popoburu’ seni id pogun diti montok poposimbuat ‘produk’ om karya seni nokoiyonon, suai ko’ inggisaman i pinosodia’ montok monguhup maangampawong kosuul no id kaganaan pongindopuan.
Id sisimbar disio, Boyoon Montiri pinopointalang do koporintaan pogun toririmo mintong kogugunoon rayat kaampai no tinimungan seni om maangampawong montok umampai popoburu’ pogun tumanud kabaahan sompoopori.
Kogugunoon nogi’ kopokionuan tinimungan momomonsoi karya om maangampawong kotilombus karamit pomodulianan koporintaan pogun montok poposimbuat asil karya diolo’ potilombus dino kapabantug pomorunan seni id Sabah.
Ababayan onjuran Institut Pisokodungan Koporintaan om Rakyat (IKRAR) Koupisan Boyoon Montiri Sabah dilo’ kopotimung lobi 70 tulun maangampawong nointutunan, sabaagi inggisaman po’ompus montok popoinsomok om poposindak po do kopogitimungan id pialatan koporintaan om rayat id pogun diti.
