Hajiji (tanga’) miampai tongo’ mamaramit Gaa’ Perdana Belia toun diti
KOTA KINABALU: Koporintaan pogun mamalan Enakmen Koburuon Komulakan Sabah sabaagi impohon koundangan do monginggirot koponguludan kotinanan komulakan, monginggayo kopongokunan kumaa tongo’ kaparagatan komulakan om papatantu’ kosiwatan koburuon di lobi koulud, ka di Boyoon Montiri, Datuk Seri Haji Hajiji Noor.
“Maya’ enakmen diti, mimang tokou tikid lansanon komulakan onuan timpu, kosiwatan om sokodung montok momuruan miampai poinggirot ginawo om tumilombus popouhup kumaa pogun miampai amu’ poindisanon gama-gama’ kinosimbanon katatapan,” ka disio ontok Pamaramaian Tadau Komulakan Negara Nayatan Pogun id Kompleks Sipoot Kota kInabalu do hiti, di tadau baino’.
Boyoon Montiri minoboros, Komontirian Komulakan om Spoot Sabah (KBSS) miampai Kounsol Komulakan sabah (MBS) nonuan tonggungan montok monorisid haal diti kaampai no katatapan kosimbanon umur (tinuo) komulakan.
Hajiji (poindikau, tanga’) miampai tongo’ komulakan kopihondot Pamaramaian Tadau Komulakan Negara nayatan pogun.
“KBSS om MBS popoindalan ponorisidan poinpuli karait di katatapan kosimbanon tinuo komulakan tu’ haal diti momoguno ponorisidan di poinralom miampai maganu kokiraan koyuon sosial, kinosukodon kotinanan om koyuon otopot doid Sabah,” ka disio kawagu.
Hajiji minoboros, koburuon komulakan id Sabah kotilombus kosili tingkananon koporintaan pogun kaampai koposodiaan komilaan om kakamot di gunoon montok mongimbulai lansnaon timpu dumontol pogun.
“Id siriba’ pomorintaan GRS-PH, koporintaan pogun pinopoindalan mogisusuai inggisaman montok koburuon komulakan.
“Kaadangon pulitik nokopongukab kosiwatan kumaa koburuon potitilombus nogi’ katatapan mimpau do rayat, kaampai id sunduk koburuon komulakan,” ka disio.
Hajiji minoboros, Molohingon Agayo Pogun, Tun Musa Aman id boboroson disio pinoposotol nogi do koburuon komulakan nuru’ do posuulon, lolobi no id sunduk balajaran, komilaan om kopomuruanan.
“Mantad dilo’, koporintaan pogun toririmo maganu kokiraat angkab tinimungan komulakan kaamapi inggisaman mangaba’ toilaan om komilaan kumaa diolo’.
“Iti montok papatantu’ soira’ orikot timpu dau, sukod wagu poingunda’ om kikosudongan do momuruan pogun om pomogunon kumaa rontob di lobi kasawat,” ka disio.
Hajiji tinanud di Montiri Komulakan om Sipoot, Datuk Ellron Angin, sinuau dilo’ tongo’ komulakan kopihondot Pamaramaian Tadau Komulakan Negara nayatan pogun.
Boyoon Montiri minoboros, koporintaan pogun pinopoimpuun mogisusuai laang om ababayan ponguhupan balajaran i kapanahak koundaran kumaa susumikul id pogun diti.
Minoboros isio, inggisaman wagu miagal Toluod Mahasiswa Pinsingilaan Akawas Suang Pogun (SENTOSA) om Toluod Kaparagatan Sikul Miampai ‘One-Off’ (SUKSESS) nga’ pinointutunan montok popoinggayo piromutan kumaa balajaran akawas nogi’ monokodung kaparagatan sikul.
“Inggisaman ngaawi’ nopo diti wookon mantad di 13 inggisaman balajaran i pinosodia’ kumaa susumikul, sikul, Koisaan Molohing om Mongingia’ (PIBG) nogi’ koisaan mahasiswa Sabah id suang om sompogunan miampai kopoobian koinsanai kiginumu’ RM75.5 riong,” ka disio.
“Inggisaman suai i pinoindalan om tinilombus do toun diti kaampai no Ponguhupan Tusin Tunui One-Off Koporojistoran IPT (BUDI), Ababayan Ponguhupan Komputer (BAIK), Ponguhupan Pinotomod Tusin Tunui Poporisaan (BAKTI), Ponguhupan Tabung Balajaran Pogun (BISTARI), Sekretariat Mahasiswa Sabah Malaysia (SEMESTA) om Ponguhupan Tikit Pontuludan Susumikul Sabah(GRS-SUBFLY).”
Id haal koburuon komilaan, ka di Hajiji, koporintaan pogun tumilombus monginggirot Balajaran om Pingludaan Teknikal om Vokasional (TVET) nogi’ ababayan pingludana teknikal id pogun diti.
“Lobi 179 kurusus id kaganaan sains, tiknologi, inovasi om boros i pinoindalan toun nakatalib, kopohompit lobi 35,000 kinotonudan. Mongunsub tokou nogi’ komulakan do umampai id pomorunan tumau om gas Sabah i nokoburu’ montok mongingkawas komilaan om monumboyo’ kopomogunaan siktor ginoris do timpu dumontol,” ka disio.
Minoboros isio, koburuon komulakan id kaganaan sipoot nga’ nonuan kopomodulianan maya’ pinonuridongan om minonginsonong kogogonopan sipoot miagal kompleks sipoot, gelanggang komulakan om gelanggang ogumu’guno id koiyonon labus kakadayan i noondo diti noguno do mogigiyon nokoiyonon.
Id timpu miagal, ka disio, ababayan kiwaya’ akawas miagal Felo Sabah Maju Jaya (Felo SMJ) om MBS i pinoindalan miamapi MBS nogi’ Inkubator Kopomuruanan Komulakan sabah (IKEBS) pinoposodia’ koiyonon bobos osonong montok sukod wagu mongintarom bakat id ‘ekosistem’ kopomuruanan om kopoindalanan pogun.
Hajiji pinopointalang ngoi’ do kotumbayaan kumaa tonggungan MBS i sinokodung do KBSS sabaagi tinan agayo om toruntud tinimungan komulakan pogun diti.
“Mantad dilo’, pokionuon ku Kounsol Komulakan Sabah tumilombus momuruan tongo’ komulakan id pototongkod pogun miampai poinponu’ tinonggungan om tumilombus popointutun ninggisaman nogi’ ababayan bobos osonong, kosudong om kopohompit ngaawi’ montok koburuon koposimbayan sukod wagu,” ka disio.
Hajiji minokianu tongo’ komulakan do tumilombus miampai koporintaan om monokodung koinsanai inggisaman montok koundaran diolo’ om kasasanangan rayat.
“Kanou tokou no miuhup miampai koporintaan do monilombus kaadangon pulitik om koburuon ikomomi maya’ piuhupan om sokodung po’ompus. Oponsol iti montok papatantu’ koturunduson kopoindalanan koburuon id pogun diti.”
