Hajiji minongomot parai id Ramai Kaamatan Papar.
PAPAR: Boyoon Montiri, Datuk Seri Haji Hajiji Haji Noor minogowit habar kounsikou kumaa mogigiyon do hiti soira’ pinopolulus kopoobian koinsanai kiginumu’ RM5 riong montok Gereja St. Joseph om lintuhun ogumu’guno Kampung Marahang id Limbahau, di tadau baino’.
Minoboros id Ramai Kaamatan Papar doid Kampung Marahang di tadau baino’, Boyoon Montiri minoboros pinolulus disio upalai di Puru Lintuhun Undangan Pogun (ADUN) Limbahau, Datuk Juil Nuatim montok monuridong lintuhun wagu montok Gereja St. Joseph.
Pinolulus nogi’ disio kopoobian soginumu’ RM1 riong montok monginsonong tongo’ kogogonopan id pososorili’ lintuhun ogumu’guno Kampung Marahang.
Boyoon Montiri po nogi’ Ponorikohon Kotinanan Mongingigit Tonggungan Yayasan Sabah minoboros, do kaakun isio pinopoobi’ somboogian tana’ pasanganu Yayasan Sabah montok kogunaan rayat id Kampung Gana om koiyonon pososorili’ dilo’.
“Iti nopo nga’ koporintaan montok oinsanan rayat Sabah. Aadang tokou kumaa rayat Sabah. Amu’ tokou mogihum pomoroyohan, nga’ kointalangan dilo’ atalang montok okito do oinsanan.
“Minogowit tokou do koburuon okon ko’ montok nopo wookon tulun, nga’ kumaa oinsanan amu’ momuntuk tinaru om ugama’,” ka disio.
Kohondot dilo’, pinokianu disio Lansanon Koburuon Mogigiyon (PPM) do mindahu’ om poporikot kumaa rayat id nayatan siriba’ di inggisaman i pinoindalan do koporintaan.
Hajiji minoboros, Ramai Kamaatan nopo nga’ impohon montok popigirot piromutan id nayatan mogigiyon mogisuai tinaru id Sabah.
Nokotindapou nogi’, Montiri Pidagangan Suang Pogun om Balanja Masi i po nogi’ Puru Parlimen Papar, Datuk Armizan Mohd. Ali om i Potunud Yayasan Sabah po nogi’ ADUN Kawang Dato’ Sri Ghulamhaidar Khan Bahadar.
