Dr. Joachim (tanga) guminambar pongingitanan miampai tombului naalap i nokotindapou om Puru Kounsol Watas Lahad Datu montok sesi 2025-2027.
LAHAD DATU: Puru Kounsol Watas nuru’ kipogoyuon “going extra mile” toi ‘mooi lobi kosodu’ koowit rati katamaan popowonsoi lobi kagayo ko’ mantad di nopikiikiraan nung orohian no kokito kalantaion om kobontugan id sistem kapatahakan koporintaan nokoiyonon.
Kumoduo Boyoon Montiri po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, pogoyuon diti no i koponompini’ id pialatan popoindalan nopo tomod do karaja’ om i otootopot kapanahak waya’ kumaa rayat.
“Going extra mile kirati do katama’ tokou papatahak lobi kosodu’ ko’ mantad di pokionuon, minggisom lobi ko’ mantad di pinatantu’. Iti no kunci kumaa kalantaion di otopot. Amu’ tokou kaanu gumura’ nopo id waya’an di noubasanan, nga’ kiguno kobulun lumaan lobi kosodu’,” ka disio ontok pinopoimagon Ramai Kinapatahakan Watikah Koposilihan om Tuminaru Puru Kounsol Watas Lahad Datu montok sesi 2025 gisom 2027, do hiti di tadau baino’.
Dr. Joachim (kotolu, wanan) pinopotunui watikah koposilihan kumaa Puru Kounsol Watas Lahad Datu montok sesi 2025-2027 om sinasi’ di Dr. Jamili om tombului di suai.
Dr. Joachim minoboros, id sunduk do Bohogian Kikuasa’ Nokoiyonon (PBT), ponginsomokan diti kirati do puru kounsol okon nopo ko’ popoindalan tonggungan pinatahak, nga nogi’ mindahu’ mokinongou rolou rayat, manalasai kobolingkahangan id kinoiyonon miampai poinsonong om toririmo mogihum kosiwatan ponginsonongan id kapatahakan surupukaraja’.
Pinointalang disio, inggisaman di agayo dilo’ kiguno patanggayan di koyuyuon tonggungan, poinponu’ ginawo, miuhup id tinimungan om kotumbayaan.
“Otumbayaan oku miampai haro ‘effort and commitment’, ‘teamwork and trustworthy’, Kounsol Watas lobi kabantung om pantangon rayat,” ka disio pinoposotol.
Komoyon po nogi’ disio komontirian dau sabaagi ‘tama’ i mangahak PBT sabaagi ‘tanak’ mooi do amu’ kasansala’ id kopoindalanan karaja’ sompoopori. Ka disio, PBT nopo kitonggungan popokito naangayan bobos osonong om manamong ngaran tosonong kotinanan.
Id ramai dilo’, Dr. Joachim minokianu nogi’ oinsanan puru kounsol di kosisili do toririmo id suang iso’ tinimungan i mamanau sopidabar kumaa sondikoton miagal.
“Kada’ do haro o mundorong momosi, nunu podi momosi id hapak di poinsulak. Nung oinsanan momosi midabar, korikot tokou id rikoton do lobi kosikap om oturundus,” ka disio, sumuku’ di ‘analogi’ kotinanan sabaagi songinan padau.
Dr. Joachim minoboros, puru kounsol nuru’ poposili tikid kaantaban sabaagi kosiwatan minsingilo om amu’ orosian do momonsoi kootusan montok koponsolon rayat.
“Mositi’ tokou katama’ lumaang kumaa toguang. Kosilapan okon ko’ kaantob, nga’ puralan. Karaja’ tokou nopo papatantu’ surupukaraja’ i aramit do rayat toririmo di bobos osonong,” ka disio.
Otumbayan isio do piomungan nawawaya’an, sunduan om pogoyuon papatahak di lobi ko’ mantad kinoubasanan id nayatan puru kounsol koposili Kounsol Watas Lahad Datu sabaagi kotinanan turianan id Sabah.
Nokotindapou nogi’ Monunurat Atatap Komontirian, Datuk Dr. Jamili Nais; Ponorikohon Kounsol Watas po nogi’ Upisor Watas Firuz Irzualdeen Benetty Mohd Dzul om Upisor Eksekutif Kounsol Watas, Jackley Gielbert @ Lontou.
