Dr. Joachim (poindikau, tanga) nogi’ tongo’ tombului di nokorikot guminambar miampai Puru Kounsol Watas Ranau sesi 2025-2027.
RANAU: 18 tulun sinili Puru Kounsol Watas Ranau montok sesi 2025-2027 id iso’ ababayan ‘angkat sumpah’ (tuminaru) i pinoindalan di Kumoduo Boyoon Montiri II po nogi’ Montiri Koporintaan Koiyonon om Pomuwalaian Sabah, Datuk Seri Dr. Joachim Gunsalam id Hotel Perkasa Kundasang, di tadau baino’.
Pinopolombus panangkabayahan kumaa koinsanai i sinili, Dr. Joachim pinoposorou diolo’ do tonggungan puru kounsol okon ko’ ponokotanda’-tanda’ nopo, nga’ posunduran kumaa katatapan om laang bohogian kikuasa’ nokoiyonon (PBT).
“Bayahan om kounsikaan kumaa koinsanai 18 tulun Puru Kounsol i sinili mantad kotumbayaan di pinatahakan do kopomuruanan pogun. Yokoyu no o ‘kaunselor’ kumaa Koporintaan Nayatan Kotolu, papamanau tonggungan oponsol id kasasanangan mogigiyon nokoiyonon,” ka disio.
Pinosotol nogi’ disio do sabaagi koporintaan nayatan kotolu, PBT kiharo kuasa poinpoopori om tikid kootusan di winonsoi kiguno sorisidon miampai poinponu’ tonggungan nogi’ mimpau kumaa koponsolon ginumuan.
“Mantad pomulisinan premis, palan koburuon, panamangan asil gisom no kopolulusan teknikal – oinsanan dilo’ kapanahak waya’ mitilombus kumaa rayat. Momoguno tokou kopulokison om kinotulidon id tikid laang,” ka disio.
Dr. Joachim (kotolu, wanan) pinopotunui watikah koposilihan kumaa Puru Kounsol Watas Ranau montok sesi 2025-2027, Samsul Sinun.
Id sunduk kopoburuan, minoboros isio, kopogi’isaan id pialatan oinsanan koupisan oponsol kopio mooi do koburuon di pinalan okon ko’ koponumboyo nopo kogunoon ikonomi nga nogi’ kosudong mantad sunduk sandad posorili’ om kotundunan rayat.
Ka disio, kakadayan okoro miagal Ranau om Kundasang noondo nga’ kotoguang nogi’ kaantaban ‘urbanisasi’ miagal di notoguang id kinoiyonon suai doid Sabah om Malaysia do poinpuli.
“Kounsol Watas kiguno ‘progresif’, momonsoi tongo’ katatapan i osuau mangangapu’, osurau rayat om kipomusarahan anaru mooi do Ranau kotilombus komogoton miampai ogirot,” ka disio kawagu.
Pinosotol disio do koposolihan nuludan puru kounsol diti kalansanan kaanu monginggirot tinonggungan kopoindalanan om monginsikap kootusan kosudong id nayatan nokoiyonon.
Pinokianu disio oinsanan Puru Kounsol do popoindalan tonggungan pinatahak miampai poinponu’ ginawo, kabaalon om tinonggungan.
“Kada’ parama’-ramao’ kotumbayaan di pinatahak. Otumbayaan oku, miampai pogisokodungan oinsanan bohogian, Ranau kotilombus koburu’ sabaagi watas di koburu’ miampai poinpuli,” ka disio.
Nokotindapou nogi’ i Monunurat Pointatap Komontirian, Datuk Dr. Jamili Nais; ADUN Sinili, Datuk Amisah Yassin; Upisor Watas Ranau, Tinus Manggam; Upisor Eksekutif Kounsol Watas Ranau, Elmer Endra M. Sator; mobi’ kumaa Puru Parlimen Ranau, Louis Sinti; mobi’ kumaa ADUN Karanaan, Datuk Faimin Kamin; mobi’ kumaa ADUN Paginatan, Hishamuddin Harun; Luguan Watas OKK Muhasip Haji Roman om OKK Dominic Ghanie.
