Limus (tanga’) ruminamit tandamato pinotunui di Nelson.
KUALA PENYU: Oinsanan Bohogian Kikuasa’ Nokoiyonon (PBT) nunsub do popoindalan kopomogompian sandad posorili’ maya’ ponginsomokan nubasanan ‘otomou’ id tikid kopotundaan id watas sompoopori.
Monguhup Montiri Karaja Agayo, Datuk Limus Jury minoboros PBT nga’ kiguno nogi’ manahak sokodung kumaa di inggisaman do Komontirian Koporintaan Koiyonon om Pomuwalaian (KKTP) i po nogi’ popogura’ om momumuruan id kapamalanan puralan om sondikoton pogun nogi’ mongulud koburuon lanskap di lobi koulud om osonong.
“KKTP id inggisaman montok papagaras om monginggirot tikid pamalanan kaampai no pamalanan lanskap kumaa koponigompotan koburuon ‘lestari’.
“Haal diti sabab no do PBT nopo nga’ posunduran om nosili pangadang kopoindalanan ababayan toi projik i moningkanan inggisaman kumaa koburuon lanskap lestari.
“Kopiongoi do inggisaman dilo’, oinsanan PBT unsubon do momoguno kopoindalanan toi laang di koponokodung do kopomogompian sandad posorili’ om mongingkuri’ waya’ araat kumaa pomogunan maya’ ponginsomokan nubasanan otomou id tikid koburuon doid watas sompoopori.
“Inggisaman nopo diti nga’ montok momogompi’ intodonon sandad suai ko’ poposotol konsep ikonomi ‘kitaran’ di poinggompi’,” ka disio pinopointalang.
Ka disio, id inggisaman monoibau kosimbanon iklim, mogigiyon kiguno tumonggoi popoindalan inggisaman kopomogompian sandad posorili miampai osompuru om aadang.
“Tonggungan diti kiguno saanon do oinsanan bohogian id inggisaman papatantu’ kotilombuson mogigiyon noondo om timpu dumontol.
“Otumbayaan tokou do kunci montok manalasai kobolingkahangan iklim nopo nga’ id kopongingkurian kopoiduan gas karbon dioksida om poposimban mogigiyon montok manamong kotilombuson sandad posorili’,” ka disio ontok minoboros pinopoimagon Ababayan Jelajah I-Hijau (Inisiatif Hijau KKTP, Aspirasi Sabah Maju Jaya) 2025 do hiti, di tadau Ko’onom, katatalib.
Limus po nogi’ ADUN Kuala Penyu nga’ minongunsub oinsanan mogigiyon watas dilo’ do papatanom koyuon osonong id kopotontuan kopomogompian watas dilo’ ogompi’ om pointamong.
“Koulalaho’ orohian popintaam rinomos om i taamon mantad korita’ kumaa ralan mositi’ no do talaban om simbanan.
“Nubasanan oburisi’ om manamong kinolumison posorili’ watas nopo nga’ kopiongoi do sondikoton watas diti om kosimbanon mooi kosili longkod ponombuluyan wagu id pomogunon diti.
“Kiguno tokou oinsanan mogiuhup lolobi no lansanon om mogigiyon monokodung kopoindalanan Ababayan Kampung Lestari Kuala Penyu i pinoimpuun di YB Montiri KKTP id sinasawat poingukab Monsoi Point di ko 23tw Kohopod om Iso’ 2024 di nakatalib.
“Ababayan i pinointutunan do Kounsol Watas Kuala Penyu nopo nga’ inggisaman bobos osonong montok monguhup, mogowit mogigiyon tokou kumaa inggisaman oinsanan momogompi’ intodonon ginoris sandad miampai po’ompus om koposili kampung komogot id koburuon sosial, ikonomi om mongimbulai mogigiyon Lestari i ounsikou oulud,” ka disio.
Kohondot dilo’, komoyon di Limus kopoindalanan Ababayan Jelajah I-HIJAU 2025 kopiongoi kopio di pongunsuban kumaa mogigiyon kosuul no id Kuala Penyu montok monigampot mogigiyon kiginoris iyonon kopiongoi di visi KKTP ilo’ nopo nga’ “Kumaa Koposiahan Koburuon Ogirot om Monigampot Kasasanangan Mogigiyon”.
“Ababayan i kumoinsan pohoroo’ id watas diti nopo onjuran piniuhupan do Kounsol Wata Kuala Penyu om KKTP om ilo’ nopo nga’ kosiwatan kopohompit oinsanan mogigiyon montok poposodia’ laang otitimung montok no momogompi’ kotilombuson lanskap pososorili’ tokou,” ka disio kawagu.
Nokotindapou nogi’, Upisor Watas Kuala Penyu, Nelson Domil Oluk; Luguan Monguhup Monunurat (Landskap) KKTP Nurulhayati Awang More; Upisor Eksekutif Kounsol Watas Kuala Penyu, John Genchit i po nogi’ Ponorikohon Puruankuasa’ Popoindalan Nayatan Watas om tongo’ upisor eksekutif mantad PBT pototongkop wats om mongongobi’, luguan ngaawi’ koupisan om mongongobi’ oinsanan kotinanan koporintaan om lalansanon mogigiyon.
Notimpuunan di Festival “I-HIJAU KKTP” di toun 2023, ababayan Jelajah I-HIJAU KKTP potilombus diti pohoroon id watas Tenom.
