Hajiji miampai nuludan puru MPWS i wagu sinili. Okito nogi’, Monunurat Koporintaan Pogun, Datuk Seri Sr. Safar Untong (kotolu, gibang) om Monunurat Pointatap Komontirian Koburuon Mogigiyon om Kasasanangan Rayat, Datuk Maria Chong (wanan).
KOTA KINABALU: Boyoon Montiri, Datuk Seri Haji Hajiji Haji Noor orohian kokito lobi kogumu’ koonduan oinggarasan maya’ ababayan kiwaya’ i kapanahak diolo’ ginoris montok momonsoi sumpili’ nogi’ kohompit id katatapan om kapamansaian kootusan.
“Lobi po koponsol, mokianu oku koonduan onuan koromuton kumaa kosiwatan kaampai kopogorisan id kaganaan ikonomi, balajaran om pulitik mooi do kanau yolo’ momonsoi kootusan i kapanahak waya’ osonong kumaa koposion diolo’ om paganakan,” ka disio.
Minoboros id ababayan tuminaru Puru Kounsol Monontuduk Koonduan Sabah (MPWS) di wagu kosili id Menara Kinabalu di tadau baino’, Boyoon Montiri minoboros, kopogorisan koonduan oponsol kopio okon nopo ko’ montok koundaran om kasasanangan koonduan nga nogi’ montok koburuon mogigiyon do oinsanan.
“Kopogorisan koonduan koowit kumaa asil ikonomi di lobi kosonong, paganakan di lobi kolidas om mogigiyon di lobi kaadang. Nga’, iti momoguno inggisaman pogiuhupan mantad oinsanan bohogian – Koporintaan, kotinanan om minsosongulun – montok mongimbulai koyuon di kopohompit ngaawi’ i kapasaga’ koonduan kotilombus koburu’.
“Mantad dilo’, kalansanan ku nuludan MPWS di wagu diti kaanu sumili wookon mantad popogura’ koporintaan id kopoingkawasan kohompitan koonduan id mogisuaian haal montok mongimbulai koonduan kitoilaan om abantug i koposimbuat ngaran Sabah kumaa nayatan sompomogunan,” ka disio.
Hajiji suminain surat kinoposilihan di Dr. Rosmahwati.
Hajiji minoboros, tonggungan om koponsolon koonduan sabaagi ‘modal insan’ i koposiau koburuon pogun nokointalang.
“Kohondot dilo’, oinsanan bohogian kiguno pamanau tonggungan monguhup koporintaan mongimbulai koonduan di kitoilaan, lolobi no id koponoguangan kaantaban koburuon ikonomi i momoguno komilaan om ‘inovasi’,” ka disio.
MPWS tinuridong sabaagi tinan mongungulud om monontuduk kumaa koporintaan pogun nogi’ kosili popiromut id pialatan koporintaan om kotinanan okon koporintaan koonduan.
“MPWS nga’ popoindalan nogi’ do katatapan om kaparagatan i kapanahak koundaran kumaa koonduan id Sabah id nayatan pogun, kabansana om sompomogunan, do wookon.
“Mantad dilo’, kumaa diolo’ i sinili mongigit karaja’ id kounsol diti, ilo’ nopo iso’ pamantangan tu’ pinili’ om nonuan kotumbayaan do momuruan inggisaman papatantu’ koonduan id Sabah kaanu koundaran mantad katatapan nogi’ kaparagatan koporintaan maya’ MPWS,” ka disio.
Hajiji suminasi’ ababayan tuminaru.
Hajiji minoboros, MPWS nga’ kapapanau tonggungan oponsol sabaagi tinan momumusorou, posunduran om misokodung miampai Koupisan Haal Koonduan Sabah (JHEWA) id koposompuruan inggisaman popoburu’ koonduan id pogun diti.
“MPWS kiharo turu’ puruankuasa’ okoro’ i tinuridong montok popomogot koburuon koonduan ilo’ nopo nga’ Ikinomi, Balajaran, Sosial, Kolidasan, Undang-Undang, ‘Gender’, Koonduan om Media.
“Pokionuon ku JHEWA i sabaagi Urus Setia MPWS monguhup kopoindalanan ababayan i pinalan do MPWS. Iti oponsol kopio id inggisaman popogoris om monimbuat bantug koonduan id Sabah.
“Kalansanan ku nogi oinsanan puru kounsol i wagu sinili kaanu papatantu’ sondikoton MPWS montok papagaras kotundunan mogigiyon maya’ puruankuasa’ di poinharo mantad,” ka disio.
Minonogulu tuminaru puru MPWS di wagu dilo’ i Ponorikohon, Datuk Dr. Rosmahwati Lasuki.
Puru wagu MPWS nopo nga’ ii Datin Fauziah Abu Bakar Titingan, Jais Asri, Prof. Ts. Dr. Imbarine Bujang, Viviantie Sarjuni, Dayang Selha Ibrahim, Nor Saadah Omar, Nor Azah Abd. Rahman om i Datin Atin Belynda Buntot.
