Joniston minintong koiyonon naraag om minaganu kointalangan kaawagu mantad bohogian JKR om kuntiriktor kohondot koyuon dilo’.
KIULU: Wawayaan agayo koporomut Tamparuli-Kiulu insan po do noputut nosusuhut kinaantakan tana’ notuhan gama-gama’ rasam asapou po’ompus, nokopohimpogong kapapanaho mogigiyon nokoiyonon om momoguno talun-alun.
Ralan Tamparuli-Kiulu KM2.45 sinompon do bohogian Koupisan Karaja Agayo (JKR) Tuaran mantad no do waya’an naamot notuhan om manahak kosiwatan kumaa karaja’ ponginsonongan.
Puru Lintuhun Undangan Pogun (ADUN) Kiulu, Datuk Joniston Bangkuai minindahu’ di kosuabon baino’ do minooi intong sondiri koiyonon di noinraagan om maganu kointalangan kaawagu kohondot koyuon dilo.
Minongunsub isio JKR mooi do sumikap momonsoi waya’an naamot montok papasanang kapapanahon tulun ginumuan miampai amu’ kagangau di karaja’ kopongundaran ralan di notuhan.
“Orotian ku koinggoritan i otoguang mogigiyon Kiulu nosusuhut pinonomponan ralan waya’an diti.
“Kalansanan ku waya’an naamot aanu momongo tosisikap, montok kosimbayanan tongo’ moomoguno lolobi no yolo’ i poingkaraja’ id labus Kiulu nogi’ tangaanak sikul i nuru’ do mooi sikul,” ka disio.
Monguhup Montiri Ponombuluyan, Koubasanan om Sandad Posorili’ dilo’ pinopolombus nogi’ do kotongoban di waya’ kinaantakan diti kohondot siktor ponombuluyan i nosili wookon intodonon ikonomi mogigiyon id Kiulu.
“Amu’ tokou mimang siktor ponombuluyan Kiulu oumpadanan. Wawaya’an diti oponsol montok tutumombului mooi id koiyonon ngaawi’ eko-ponombuluyan do hiti,” ka disio.
Tumanud disio, bohogian JKR om kuntiriktor minanahak jominan do minggisom yolo’ momonsoi waya’an naamot do osisikap.
Minoboros isio, pirubaan kitimpu pointantu’ miampai Potunud JKR om Injinior Watas toririmo pohoroon montok papatantu’ laang posusuhut kumaa mogisusuai kobolingkahangan kopohompit kinaraagon wawaya’an agayo Kiulu aanu popoindalan miampai poinpuli.
“Naamot pinoilo oku kaantaban om kohimpogongan i potoguang do JKR tu’ kotoguang nogi yolo’ kobolingkahangan miagal id kinoiyonon suai, kalansanan ku mooi panalasaian aanu monigampot id timpu toruhai do papatantu’ koumoligan om koturunduson kapapanahon mogigiyon Kiulu,” ka disio kawagu.
Nokotindapou nogi’ i mobi’ mantad Upis Watas Tuaran do minooi intong koyuon maso-maso.
Joniston pinoposotol do tumilombus isio mintong poinsomok kinoburuon karaja’ ngaawi’ kopongundaran ralan om papatantu’ oinsanan bohogian poinhompit kapapanau tonggungan sompoopori.
Pinopoilo nogi’ isio do id sesi kopogompitan kaawagu miampai bohogian JKR Tuaran, pinokianu disio mooi do kopiantangan di lobi kasaru’ powonsoiyon id po’ompus wawaya’an agayo id Kiulu.
“Iti oponsol mooi do tanda-tanda’ osopung tana’ otuhan oilaan om laang osopung komilo onuon montok mongilag kaantakan lobi karaat,” ka disio kawagu.
Daamot dilo’, pinokianu disio mogigiyon Kiulu do modsinorou soira’ momoguno ralan ngaawi’ suai nanamot mindad kopongohan karaja’ ponginsonongan.
Ralan suai i aanu do maya’ nopo nga’ Ralan KK-Kudat, Ralan Stesen TV Lawamandau, Ralan Bungoliu Logkou Timbok, Ralan Kiulu Logkou Lama, om Ralan Kiulu Lawamandau montok mooi id Kakadayan Kiulu.
