Dr. Joachim (mija’ tanga’, poindikau) guminambar miampai oinsanan tombului om tutumanud Highland Safari 2025 id Sinasawat Poingukab Kundasang.
KUNDASANG: Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam, pinopoimagon ababayan Highland Safari 2025 i nakapanau id Sinasawat Poingukab, Kundasang, do hiti di songkosodop.
Ababayan pinaanjur kumoinduo dilo’ kopokito kotonudan soginumu’ 160 tinan padsakaian 4WD om 60 tinan mutusoikol ‘lasak’. Ababayan solinaid tolu tadau nokotimpuun di ko 19tw Kaapat dilo’ minogowit tutumanud minaya’ ralan kopoinsingumbal mantad Kakadayan Kundasang kumaa Bambangan, Lipasu, Mamut om nopupusan id Sinar, Kundasang.
Dr. Joachim i po nogi’ Puru Lintuhun Undangan Pogun (ADUN) Kundasang minoboros, ababayan miagal diti kopoinggirot po do siktor ponombuluyan nokoiyonon, kosuul id watas Kundasang om Ranau.
“Kopongonjuran diti okon nopo ko’ kosili koiyonon pialaan, nga kopointutun po nogi’ koiyonon ponombuluyan id Kundasang i nointutunan mantad nodi mogisusuai kaparagatan miagal Pesta Kobis om ababayan manangkus,” ka disio.
Dr. Joachim (gibang) ruminamit tandamato mantad di Samsul.
Minonongkounsikou nogi’ isio kumaa puruankuasa’ manganganjur, binuruan di Samsul Sinun, mantad inggismaan pinapalantoi ababayan dilo’ miampai sokodung mogisusuai bohogian kaampai mananakadai, kotinanan koporintaan om tinan okon koporintaan.
Ka disio, koyuon tawan di osogit id Kundasang i kosigampot 9 darjah Celsius miampai sowogi’ tongus om rasam, nokoposili koiyonon dilo’ ririkoton olumis om koimbayat kumaa tutumombului suang om labus pogun.
Dr. Joachim (kotolu, gibang) guminambar pongingitanan miampai nangkalantoi Highland Safari 2025.
Daamot dilo’, minonongkounsikou nogi’ i Dr. Joachim kumaa oinsanan nakalantoi pinialaan om pinapatahak kopongunsikohan kumaa di Upisor Watas Ranau, Tinus Manggam, i minonorikohon nogi’ do ababayan id nayatan watas.
Pinopolombus nogi’ isio pongunsikohan kumaa kotinanan ngaawi’ di nakaampai miagal kolinik kolidasan, tinimungan pongubatan, Taman-Taman Sabah, Pulis Diraja Malaysia (PDRM) Bohogian Ranau, Koupisan Sukarelawan Malaysia (RELA), om Angkatan Pertahanan Awam Malaysia (APM) mantad sokodung om tonggungan pinapalantoi ababayan dilo’.
“Nung rayat tumilombus manahak mandat kumaa koporintaan di poinharo mantad, tumilombus oku manahak sokodung poinponu’ kumaa pongonjuran Highland Safari diti montok toun-toun dumontol,” ka disio.
Naamot dilo’, Samsul pinopolombus pongunsikohan kumaa di Dr. Joachim mantad sokodung om pongunsikohan kumaa oinsanan i nokohompit kaampai monontuduk ababayan, Simon Leong Ken Hung, nogi’ Komontirian Komulakan om Sipoot mantad pisokodungan ogirot.
Ababayan dilo’ notindapou nogi’ di Upisor Watas Tongod, Yuesri Ismail Yusof i po nogi’ ladjong mantad Kundasang, nogi’ tongo’ presiden koisaan padsakaian 4WD mantad pototongkop Sabah.
