Dr. Joachim (poindikau koonom, gibang) guminambar pongingitanan miampai tombului apantang om oinsanan puru LPPB i nokotindapou id ramai dilo’.
KOTA KINABALU: Komontirian Koporintaan Koiyonon om Pomuwalaian (KKTP) lumansan Kotinanan Koburuon Pomuwalaian om Kakadayan (LPPB) koponilombus kalantaion tosonong id kapatahakan surupukaraja’ sabaagi poposodia’ walai ogoosan sumanganu nogi’ koburuon kakadayan wagu id pogun diti.
Kumoduo Boyoon Montiri II po nogi’ Montiri KKTP, Datuk Dr. Joachim Gunsalam minoboros, oponsol iti montok papatantu’ mandat pinoowitan koporintaan aanu papadalin miampai kiwaya’ montok koundaran rayat.
Minoboros isio dilo’ ontok pinopoimagon Ramai Pamaramaian “Meriah Lain Macam” Raya LPPB 2025 id Longkod Konvensyen Sompomogunan Sabah (SICC), do hiti di tadau baino’.
Ka disio, iti nopo nga’ kumoinsan nogi’ disio kotindapou id ramai pamaramaian Tadau Raya onjuran LPPB pointonod sinili minomuruan komontirian dilo’.
“Sabaagi Montiri KKTP, orohian oku popolombus angkab om kalansanan mooi do puru karaja’ LPPB kotilombus mongingkawas naangayan surupukaraja’ om monimporon kinalantaion id kapatahakan mandat di pinoowitan do koporintaan.
“LPPB kiharo tonggungan oponsol sabaagi poposodia’ kawalaian kos osiriba’ ogoosan sumanganu om id koburuon tongo’ kakadayan wagu di ongosonong,” ka disio.
Dr. Joachim (gibang) om Rosemary tuminabi’ om monongkirumo dilo sitaf LPPB.
Dr. Joachim nga’ pinopolombus nogi’ do kalansanan mooi piromutan osonong pialatan KKTP om LPPB kotilombus oinggirotan id inggisaman papatantu’ rayat karamit surupukaraja’ bobos osonong.
“Kopiongoi do kalansanan diti nogi’, lumansan piuhupan misulak id pialatan KKTP om LPPB kotilombus koinggirot, mooi do kapatahakan surupukaraja’ kumaa mogigiyon aanu popoindalan miampai ‘proaktif’.
“Inggisaman diti nga’ kopihunung nogi’ di kopoindalanan palan koburuon Sondikoton Sabah Maju Jaya i moningkanan kumaa koponsolon rayat,” ka disio.
Pinoposorou nogi’ isio di puru karaja’ LPPB mooi do toririmo monidsorou om kitonggungan id kopoindalanan karaja’ id timpu pomgounan digital di otimpas do babaino’ diti.
“Nung kaanu, orohian oku poposorou, id koyuon pomogunan id tompok tunturu’, hinombo kointalangan om toisoiso’ kaantakan aanu popotonu’ miampai otimpas kopio, nga’ mingat-ingat no id kopoindalanan karaja’.
“Poindalanon karaja’ miampai poinponu’ tinulid om tinonggungan mooi do tikid laang om kootusan kapanahak koundaran om okon ko’ sambalik dilo’,” ka disio.
Dr. Joachim (koduo, wanan) ruminamit tandamato mantad di Masiung.
Dr. Joachim minoboros, sunduan pisompuruan, id paganakan om piuludan doid kotinanan nga’ kosili nogi’ ginaras oponsol i kiguno pususon montok papantantu’ kotinanan dilo’ kotilombus kiginoris tumopong om poinggirot.
Ramai pamaramaian Tadau Raya dilo’ rinamai nogi’ miampai mogisusuai pialaan kikonsep sunduan id tinimungan miagal ‘Meriah Raya Kelap-Kelip’ om ‘Paling Meriah Raya Bercucul’.
Nokotindapou nogi’ Monguhup Montiri KKTP, Datuk Isnin Aliasnih; Ponorikohon LPPB, Datuk Masiung Banah; Kumoduo Ponorikohon LPPB, Datuk Jamaliah Antalib om Monijor Tagayo LPPB, Datuk Rosemary Ahping; Puru ngaawi’ Potunud LPPB om Ponorikohon Kotinanan Potunud Tanak Komponi LPPB.
