Hajiji miampai di Shahelmey om Julaihi suminasi’ pinialanan dokumen MoU Kopongokunan Miampai Dodokot Koumoligan ECoS-SIRIM om SIRIM-MUT montok kogogonopan Lotirik om Gas id pialatan ECoS om MUT Sarawak id Ramai Pinialanan MoU id pialatan ECoS om MUT Sarawak nogi’ Kinopotimpuunan Dodokotn ECos/SIRIM om Kinopoimpuunan Ababayan TVET Angkat ECoS kopihondot Ramai Sopisuau Aidilfitri ECoS.
KOTA KINABALU: Mogisusuai inggisaman minaan onuo’ do Suruhanjaya Ginoris Sabah (ECoS) montok koburuon pogun om kasasangan rayat Sabah, kosuul no id siktor ginoris.
Boyoon Montiri, Datuk Seri Haji Hajiji Haji Noor minoboros, iti kaampai no kinopotimpuunan Dodokot Koumoligan ECoS-SIRIM doun kaawagu.
Komoyon disio inggisaman diti nopo iso’ laang ‘proaktif’ ECoS montok mongumolig koponsolon moomoguno kamapai papatantu’ do kakaomt lotirik om gak di oumolig om osonong no i padagangon id pogun diti.
Hajiji suminasi’ kinapatahakan toluod RM500,000 montok Yayasan Kotundunan Sabah mantad di Adzmir kumaa Potunud Yayasan Kotundunan Sabah, Datuk Hajah Diyanah Abdullah id Ramai Walai Poingukab Aidilfitri SEC.
Ka disio, kinopotimpuunan dodokot diti koowit nogi’ kumaa ababayan oponsol di poinggompit, ilo’ nopo Memorandum Pihunungan (MoU) id pialatan ECoS om koporintaan Sarawak maya’ Komontirian Utiliti om Telekomunikasi (MUT) Sarawak.
Ka disio, piuhupan kosudong diti oponsol kopio om kopokito pongokunan goduo kohondot koumoligan kakamot lotirik om gas nogi’ poposotol tonggungan ECoS id kopotontuan produk di gunoon do rayat katanud di piawaian (kooturan) bobos akawas.
“Ilo’ nga’ kopokito nogi’ iso’ po kaganaan piuhupan montok koundaran goduo mantad no do piromutan ogirot di poinharo mantad id pialatan Sabah om Sarawak maya’ goduduo tinan kikuasa’ mananamong sopipoopori.
“Otumbayaan oku miampai kinopikogosan MoU diti, kopoingayo iti pidagangan tongo’ produk tosonong om nookunan montok kogogonopan moomoguno om mongingindapu’ goduduo pogun,” ka disio.
Hajiji minoboros dilo’ id Ramai Pinialanan MoU id pialatan ECoS om MUT Sarawak nogi’ Kinopotimpuunan Dodokot ECoS/SIRIM om kinopotimpuunan Ababayan TVET Angkat ECoS kopihondot Ramai Sopisuau Aidilfitri ECoS id Longkod Konvensyen Sompomogunan Sabah (SICC) di tadau baino’.
Nokotindapou i Montiri MUT Pogun Sarawak, Dato Sri Haji Julaihi Haji Narawi, Kumoduo Boyoon Montiri II po nogi’ Montiri Karaja Agayo Sabah, Datuk Ir. Shahelmey Yahya om Ponorikohon ECoS, Datuk Seri Dr. Maximus Ongkili.
Kohondot dilo’, i Boyoon Montiri pinoposorou tulun ginumuan do poposuul koumoligan lotirik om gas nogi’ manahak kopomodulianan kopio di kobolingkahangan koumoligan babarang moomoguno lolobi no babarang di akawas risiko.
Ka disio, mantad kinodihuntunan mogisusuai babarang mantad labus pogun i kosuang id pomogunan diti, kaampai Sabah kapanahak koundaran kumaa moomoguno id sunduk kopogisusuaian sumpili’ om gatang di pouyuhon, nga’ sunduk koumoligan babarang kiguno onuan kopomodulianan pointopot do bohogian poinggompit.
“Sabaagi koporintaan, pointopot tokou id kopotontuan koumoligan om kasasanangan rayat, mokianu oku bohogian kitonggungan toririmo minggisom monginggirot kopongumoligan moomoguno kosuul no id sunduk koumoligan babarang moomoguno.
“Koporintaang pogun monokodung om mamaramit kopio inggisaman i nanu do ECoS miampai koporintaan Sarawak id sunduk koumoligan kakamot lotirik om gas id goduduo pogun,” ka disio.
Hajiji otumbayan, pinonuridongan ECoS nokopongukab kosiwatan wagu id koponguludan siktor ginoris id Sabah.
Ka disio, miampai kuasa’ kapanamangan i pinatahak mimpau undang-undang, ECoS kiguno tumilombus gumirot do papatantu’ koburuon siktor ginoris di oulud om opulokis, i koponokodung koburuon ikonomi Sabah nogi’ manahak koundaran mitilombus kumaa rayat.
Naamot dilo’, ontok tuminindapou Ramai Walai Poingukab Aidilfitri Sabah Energy Corporation (SEC) id Lintuhun Sipadan SICC, suminasi’ i Hajiji kinapatahakan bayaran dividen kiginumu’ RM18 riong mantad SEC kumaa koporintaan pogun, toluod RM500,000 kumaa Yayasan Kotundunan Sabah om bayaran Zakat Pongindopuan 2024 kiginumu’ RM198,536 kumaa Kounsol Ugama Islam Sabah (MUIS).
Ramai dino notindapou nogi’ di Shahelmey, Montiri Kousinan Sabah, Datuk Seri Masidi Manjun om Ponorikohon SEC, Datuk Annuar Ayub.
