Haji Hajiji Haji Noor
KOTA KINABALU: Boyoon Montiri (KM), Datuk Seri Haji Hajiji Noor pinoposotol koponongkounsikohan koporintaan pogun kumaa sokodung po’ompus mantad mogigiyon Sina sabaagi tambalut id komogoton om koburuon.
“Miampai sokodung ogirot miagal diti, otumbayaan oku Sabah toririmo id solug di kohunung id siriba’ palan koburuon Sondikoton Sabah Maju Jaya (SMJ),” ka disio id Festival Angpow Pisompuruan Koisaan Sina Sabah (FCAS), id Lintuhun Hakka do hiti di songkosodop. Teks boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Dr. Joachim (kaapat, wanan) om sawo, Datin Seri Linda Ewit, minananud di Tun Musa (tanga’) om sawo, Toh Puan Faridah Tussin, id ababayan mamagaur Yee Sang.
Hajiji minoboros, mogigiyon Sina id Sabah alaid no nakapapapanu tonggungan oponsol id koburuon ikonomi, pidagangan, balajaran, koubasanan om kotundunan sosial, o wookon.
Koporintaan Pogun tumilombus misokodung miampai oinsanan kotinanan sopihunung, kaampai FCAS i mamagatang kaadangon pulitik, montok papatantu’ koburuon ikonomi om komogoton amu’ ohimpogongan, ka disio kawagu.
Dr. Joachim (kolimo, gibang) minananud di Tun Musa (tanga’), guminambar miampai di Presiden Pisompuruan Koisaan Sina’ Sabah (FCAS), T.C. Goh (kaapat, gibang) om tombului apantang di suai id ababayan dilo’.
Molohingon Agayo Pogun (TYT), Tun Musa Aman om sawo, Toh Puan Faridah Tussin nga’ nokotindapou doid ababayan dilo’
