Hajiji minonorikohon mitingan ‘pasca’ kabinet JKM id Menara Kinabalu di tadau baino’.
KOTA KINABALU: Koporintaan Pogun monuridong Puruankuasa’ Pinotomod Sabah kokomoi Rontob Kewarganegaraan (JKKSK) om Tinimungan Pakakaraja’ Pinotomod montok monoibau kobolingkahangan mogigiyon Sabah aiso’ dokumen kointutunan tinan.
Boyoon Montiri, Datuk Seri Haji Hajiji Haji Noor minoboros, Kabinet Pogun id mitingan dau di tadau baino’ minangakun ponuridongan JKKSK montok monorisid, papatantu’, mongulud om monguhup id kopoinsikapan upalai wagu om nakalaid kohompit haal kewarganegaraan id siriba’ Perkara 15A Koundangan Pisompuruan id pogun diti.
Pinapahabar diti id mitingan pasca kabinet Koupisan Boyoon Montiri (JKM) id Menara Kinabalu di tadau baino’, minoboros isio, JKKSK onuan tonggungan montok papaatag koporojistoran tangaanak om isaisai id siriba’ 21 toun sabaagi mamasok pointanud di Perkara 18 Koundangan Pisompuruan – ‘Peruntukan Am Pendaftaran’.
“Kootusan ponuridongan Puruankuasa’ Pinotomod diti nosusuhut kes poinpuli tangaanak kinosusuon Sabah aiso’ dokumen om IC (kad kointutunan) nokoowit diolo’ nokotoguang kobolingkahangan miagal mooi sikul. Kososoruan, iti minintonod mantad kinolowongon molohing diiolo’,” ka disio.
JKKSK ponorikohon miampai di Montiri Suang Pogun (KDN) om Boyoon Montiri Sabah naamot Koupisan Koporojistoran Sabah om Bohogian Koporojistoran Ngara om Kotinanan, KDN kosili urusetia poingampai.
Hajiji minoboros, kohondot dilo’, oinsanan upalai maan tahaso’ om pookunon kumaa Puruankuasa’ Pinotomod om JKKSK – Panel Sabah, i maan ponorikohono’ dii Kumoduo Luguan Monunurat KDN om Monunurat Suang Pogun om Ponolidikan Sabah.
Montok Tinimungan Pakakaraja’ Pinotomod montok monoibau kobolingkahangan mogigiyon Sabah aiso’ dokumen kointutunan tinan, Boyoon Montiri minoboros, ilo’ maan poiliho’ id siriba’ kaganaan kuasa’ Puruankuasa’ Koponguludan Mamasok Songkosuayan id Sabah (JKPWAS), i maan ponorikohono’ dii Montiri KDN om Boyoon Montiri Sabah.
Tinimungan Pakakaraja’ Pinotomod i ponorikohonon di Luguan Monunurat KDN om Monunurat Koporintaan Pogun dilo’ kituduan manalasai kobolingkahangan po’ompus mogigiyon aiso’ kasagaan id pogun diti.
